Шу кунларда ижтимоий тармоқларда Ўзбекистон Шахмат федерацияси томонидан амалга оширилган айрим молиявий операциялар ҳақида хабарлар тарқалмоқда. Хусусан, федерация ҳисобида турган «Малибу» автомашинаси 53 млн. сўмга сотилгани ва уни сотиб олган МЧЖ директори – федерация раисининг биринчи ўринбосари эканлигига оид маълумотлар келтирилган.
Мазкур маълумотлар асосида Коррупцияга қарши курашиш агентлиги томонидан шахмат спорт турини янада ривожлантириш бўйича давлат бюджетидан Федерацияга ажратилган маблағларнинг мақсадли сарфланганлиги ҳамда эҳтимолий коррупция ҳолатлари юзасидан ўрганиш ишлари бошланганини маълум қиламиз.
Шунингдек, Агентлик спортнинг бошқа йўналишларида ҳам давлат томонидан ажратилган маблағларнинг мақсадли сарфланишига оид ўрганиш ишларини олиб бормоқда.
Ўрганиш якунлари бўйича ОАВ га қўшимча маълумот тақдим этилади, дея хабар беради Коррупцияга қарши курашиш агентлиги Ахборот хизмати.
