Ташриф давомида Озарбайжон Республикаси Иқтисодий ислоҳотлар ва коммуникациялар таҳлили маркази ҳамда Ўзбекистон Республикаси Президенти Администрацияси ҳузуридаги Иқтисодий тадқиқотлар ва ислоҳотлар маркази ўртасида ўзаро англашув меморандуми имзоланди. Меморандум Озарбайжон ИИКТМ ижрочи директори Вусал Гасимли ҳамда Ўзбекистон Иқтисодий тадқиқотлар ва ислоҳотлар маркази (Марказ) директори Обид Ҳакимов томонидан имзоланди.
Меморандумда ҳар икки марказ экспертлари томонидан бирга тадқиқот ва таҳлилларни олиб бориш, семинарлар ва тадбирларни ташкиллаштириш, стипендия дастурларини ташкил этишни ўрганиш ва ўзаро манфаатли лойиҳаларни амалга ошириш кўзда тутилган.
Қайд этиш керакки, Марказ директори Обид Ҳакимов раҳбарлигида Президент Администрацияси делегацияси, Миллий Maжлис ва турли давлат тузилмалари билан учрашувлари ташкил этилди.
Делегация аъзолари Озарбайжон хизмат кўрсатиш ва баҳолаш тармоғи (ASAN), Барқарор ва тезкор ижтимоий таъминот маркази (DOST), Иқтисодиёт вазирлиги ҳузуридаги кичик ва Ўрта бизнесни ривожлантириш агентликлари (KOBİA), Azexport, Рақамли савдо маркази ҳамда azranking.az, monitoring.az ва EnterpriseAzerbaijan.com порталларининг тажрибаси билан танишди.
Озарбайжон Республикаси Иқтисодий ислоҳотлар ва коммуникациялар таҳлили маркази томонидан ташкил этилган ташрифдан мақсад Ўзбекистон делегациясининг Президент Илҳом Алиев раҳбарлигида амалга оширилаётган муваффақиятли иқтисодий ислоҳотларни ривожлантириш моделини ўрганишдан иборат.
29 октябрь куни эса НАНА Иқтисодиёт институти Бош директори, Профессор Назим Музаффарли (Иманов) Ўзбекистон Республикаси Президенти Администрацияси ҳузуридаги Иқтисодий тадқиқотлар ва ислоҳотлар маркази директори доктор Обид Ҳакимов билан учрашди.
Маълумот учун: НАНА Иқтисодиёт институти 2020 йилда бир қатор давлат дастурларини ишлаб чиқиш ва амалга оширишда фаол иштирок этди. Институт Озарбайжон Республикаси Президентининг мамлакатимизнинг халқаро рейтингларда ўрнини ошириш тўғрисидаги фармойиши ижросини таъминлаш мақсадида ташкил этилган 18 ишчи гуруҳнинг 8 тасида фаолият юритмоқда. Институт миллий иқтисодиётнинг истиқболлари бўйича (Иқтисодиёт вазирлиги ҳузурида) Стратегик йўл хариталарини амалга ошириш ва энергетика соҳасини ривожлантиришнинг узоқ муддатли стратегиясини ишлаб чиқиш бўйича ишчи гуруҳларда ҳам иштирок этади.
Институт директори, проф. Нозим Иманов меҳмонларга илмий муассасада олиб борилаётган илмий-тадқиқот ишлари, хусусан, фундаментал ва назарий тадқиқотлар ҳақида маълумот берди. Йиғилишда Иқтисодиёт институтининг инновацион тадқиқотлари юзасидан фикр алмашилди.
Учрашув доирасида илм-фанни ривожлантиришга доир масалалар, Ўзбекистон ва Озарбайжон олимларининг ҳамкорликдаги фаолияти, олиб борилаётган тадқиқотларнинг назарий ва амалий самарадорлиги, келгусидаги тадқиқот йўналишлари муҳокама қилинди.
