ЎзР ФА Полимерлар кимёси ва физикаси институти томонидан ишлаб чиқилган “Нанодерм” — турли хил куйган яра ва чуқур яраларни даволовчи бактерисид хоссали, биоэрувчан имплант-плёнкалар ҳисобланади.
“Нанодерм” плёнкаси куйган яраларга қўлланилган вақт давомида босқичма-босқич таъсирга эга. Плёнка таркибидаги биологик фаол модда эритма, гел шаклидаги дори воситасига нисбатан узоқроқ вақт таъсир этади. Куйганлик даражасига қараб бир неча маротаба қўллаш мумкин.
Илк бор нанотехнология принципларни қўллаган ҳолда кумуш нанозарралари биоэрувчан, биопарчаланувчан полимер плёнкаларида шакллантирилди.
“Нанодерм” плёнкаси кенг таъсирга эга бўлиб, микроорганизмларга қарши фаоллик, куйган тўқималарни регенерацияловчи хоссаларни намоён этади.
Маълумот ўрнида, “Нанодерм” дори плёнкаси юқори сорбсион хоссани намоён этиб, куйган яралар юзасидаги ҳосил бўлган йирингларни ўзига шимиб олади ва микроорганизмларга нисбатан узоқ таъсирлашиш хоссасига эга. Плёнка куйган яралар юзасидан олиб ташланмайди, вақт ўтиши билан сўрилиб кетади, бу ўз навбатида бактерияларга қарши даволаш самарадорлигини оширади.
