Қайд этилишича, қуйидаги ҳолатларда кешбэк берилмайди:
- агар чек берилганига 10 кундан ортиқ вақт ўтган бўлса;
- агар сотиб олинган товар (хизмат)лар чеки учун аввал кешбэк ҳисобланган бўлса;
- автомобиль, ҳаво ва темир йўл чипталарини сотиб олиш натижасида олинган, шунингдек, алоқа ва коммунал хизматлар учун амалга оширилган тўлов чеклари учун;
- ДСҚ томонидан юритиладиган шубҳали харидорлар реестрига киритилган жисмоний шахслар чеклари учун.
Қўмитанинг таъкидлашича, шунингдек, кешбэкка эга бўлиш учун бошқа фуқаролар томонидан амалга оширилган харид чекларини эгасининг рухсатисиз рўйхатдан ўтказган шахслар шубҳали харидорлар ҳисобланади.
Бунда, харидни амалга оширган шахс ўз чеки бошқа фойдаланувчи томонидан Солиқ мобил иловасида (Андроид/иОС) рўйхатдан ўтказилганлигини аниқласа:
- чекни рўйхатдан ўтказган шахс фойдасига кешбэкдан воз кечиши мумкин;
- ёки ушбу шахс устидан шикоят қилиши мумкин.
Бунинг учун Солиқ иловасида очиладиган махсус ойнада шикоят қилишни истайсизми сўровига "ҳа" жавобини танлаш керак.
Мобил илова орқали ўзгаларга тегишли бўлган 15 ва ундан ортиқ QR-кодли чекни рўйхатдан ўтказганлиги ҳақида шикоят келиб тушган фойдаланувчилар шубҳали харидорлар реестрига киритилади.
Бундан ташқари, чеки бошқа фуқаролар томонидан рўйхатдан ўтказилган ҳақиқатда харидни амалга оширган жисмоний шахс белгиланган тартибда судга мурожаат қилиш ҳуқуқига эга.
Бошқалар рўйхатдан ўтказган ўз чеки учун кешбэк олса бўладими?
Агар шикоят қилиш пайтида кешбэк тўланмаган бўлса, чекнинг ҳақиқий эгаси солиқ органларига айнан ўша харидни амалга оширганлиги ва QR-кодли чекни олганлигини тасдиқловчи ҳужжатларни тақдим этса, унга тегишли кешбэк ҳисобланади.
Агар ушбу фактларни тасдиқлашнинг имкони бўлмаса, кешбэк суд қарори асосида қайтарилади.
