«Алан» конида табиий газ қазиб чиқарилишини назорат қилиш тўла автоматлаштирилган бўлиб, Сиқув компрессор станциясини ишга қўшиш ишлари айнан Диспетчерлик хизматида амалга оширилди.
Станциясининг очилиш маросимида таъкидланишича, кондаги қолдиқ газ захирасини (25 миллиард куб/метр) максимал даражада қазиб олиш мақсадида, иккинчи сиқув компрессор станциясини қуришга қарор қилинган. Лойиҳа бош пудратчиси «ENTER Engineering» компанияси томонидан қисқа муддатда қиймати 75 миллион долларлик технологик объект қуриб битказилди. Замонавий газ-турбина ускуналари ва компрессорлар Американинг «Baker Hughes General Electric», Украинанинг «Моторсич», Туркиянинг «Akcelik», Хитойнинг «Denair Energy» каби етакчи хорижий компаниялар томонидан етказиб берилди. Мазкур қурилма ишга туширилиши натижасида кунлик қўшимча 1,0 миллион куб/метр газ қазиб олиш имкони яратилди.
«Алан» кони паст босимли сиқув компрессор станцияси «Ўзбекнефтгаз» АЖ, «Natural Gaz-Stream» қўшма корхонаси, «ERIELL OILFIELD SERVICES MIDDLE EAST DMCC» компаниялари ҳамкорлигида амалга оширилган бўлиб умумий қиймати 75,12 миллион долларни ташкил этади.
Муборак нефть ва газ қазиб чиқариш бошқармасининг «Алан» сиқув компрессор станцияси кунлик 9,137 миллион метр/кубгача саноат газини утилизация қилиш қобилиятига эга бўлиб, «Алан» паст босимли 2-сиқув компрессор станцияси (2-СКС) лойиҳа ҳужжатлари ишлаб чиқилди ва қурилиш-монтаж ишлари якунига етказилиб ишлаб чиқаришга жорий этилди.
2021 йилда ушбу кондан 2,771 миллиард куб/метр табиий газ ва 69,6 минг тонна газ конденсати қазиб олиш режалаштирилган.
Конда олиб борилган геология-қидирув ишлари натижасида жами 234,9 миллиард куб/метр табиий газ ҳамда 8,964 миллион тонна газ конденсати захиралари мавжудлиги аниқланган.
2021 йил якунига қадар «Алан» конида 14 та янги қудуқларни бурғилаб ишга тушириш ва натижада қўшимча 164,7 миллион куб/метр табиий газ ҳамда 3,6 минг тонна газ конденсати қазиб чиқариш мўлжалланяпти.
Бундан ташқари, 36 та қудуқда капитал таъмирлаш ва интенсифкация ишларини бажариш орқали қўшимча 63,7 миллион куб/метр табиий газ ва 1,2 минг тонна газ конденсати қазиб чиқариш режалаштирилган.
«Алан» паст босимли 2-сиқув компрессор станциясининг умумий қуввати кунлик 4.569 миллион куб/метр бўлган 2 та агрегат орқали «Алан» кони паст босимли қудуқларининг саноат миқёсидаги табиий газини босимини кўтариб «Алан» сиқув компрессор станциясига ҳайдайди.
«Алан» конида паст босимли 2-Сиқув компрессор станцияси ишга тушириш орқали йилига 3.3 миллиард куб/метр табиий газ босимини ошириш натижасида, кунлик табиий газ қазиб чиқариш кўрсаткичларини 1 миллион куб/метр кўпайтиришга эришилади, деб хабар беради «Ўзбекнефтгаз» АЖ матбуот хизмати.
