Айни масала Марказий Осиёда ягона хом ашё марказига даъвогар Ўзбекистон учун долзарб саналади. Учрашувда таъкидланганидек, мамлакатимизда терини қайта ишлаш бўйича йирик қувватлар мавжуд. Бугунги кунда республикамизда 30 дан ортиқ терини қайта ишлаш корхоналари фаолият олиб боради. Ушбу корхоналарда йилига 1,641 миллиард дециметр тери қайта ишланади. Мамлакат терини қайта ишлаб ундан тайёр ва ярим тайёр чарм маҳсулотларини ишлаб чиқариш бўйича улкан захирага эга. Айни вақтда қорамол терисини тўлиқ қайта ишлаш мақсадида Туркманистон ва Қозоғистондан тери хом ашёси импорт қилиняпти. Мамлакатимизда тайёрланган қўшилган қийматга эга тайёр ва ярим тайёр чарм маҳсулотлар кейинчалик МДҲ мамлакатларига экспорт қилинади. Айни йўналишдаги ҳамкорликдан Қирғизистон ҳам манфаатдор.
Мамлакатларимиз ўртасида бир вақтнинг ўзида бир нечта йўналишларда ҳамкорлик кутиляпти. Биринчи йўналиш, Қирғизистондан Ўзбекистонга тери етказиб бериш бўйича муносабатларни йўлга қўйиш. Бунинг учун ҳамкор томон тери хом ашёсини етказиб беришда миллий ва халқаро талабларни ўрганиб чиқиши ва уларга қатъий амал қилиши лозим.
Иккинчи йўналиш, Ўзбекистон ҳамкор давлатга кушхоналар, ишлаб чиқариш корхоналари фаолиятини йўлга қўйишга кўмаклашади. Шунингдек, уларнинг хорижий сифат стандартларига жавоб берадиган илғор автоматлаштирилган ускуналар билан жиҳозланишига ёрдам бериши мумкин. Мулоқотда шу мақсадда Ўзбекистоннинг замонавий сўйиш корхоналари вакиллари ҳам иштирок этди. Улар томонидан «Калит таслим этиш» усулида ҳамкорлик қилиш бўйича таклифлари ўрганиб чиқилди.
Ҳамкорликнинг учинчи йўналиши – икки давлатнинг профиль уюшмалари ўртасида кооперация алоқаларни йўлга қўйиш саналади. Бунинг натижасида чарм-пойабзал саноатида экспорт-импорт операцияларини йўлга қўйиш, қўшма лойиҳаларни амалга ошириш, мавжуд корхоналарни модернизация қилиш ва ривожлантириш бўйича тажриба алмашилади.
Учрашув якунида томонлар ҳамкорликнинг ҳар бир йўналишини батафсил ўрганиб чиқиш ва Қирғизистонга бизнес-турлар ташкил этишга келишиб олдилар, деб хабар беради «Ўзчармсаноат» уюшмаси матбуот хизмати.
