Республика ҳукуматининг веб-сайтида ёзилишича, 11 февралдан эътиборан Коронавирус инфекциясига қарши кураш штабининг қарорига айрим ўзгартиш ва қўшимчалар киритилди. «COVID-19 беморлари билан алоқада бўлган шахсларни карантинга олиш, Қирғизистон ҳудудига кириб келган фуқаролардан ПЦР тестининг манфий натижаси ёки коронавирус инфекциясига қарши эмланганлик тўғрисидаги сертификатнинг бири мавжуд бўлса иккинчисини талаб қилиш бекор қилинди», деб қайд этилган маълумотда.
Шундай қилиб, Қирғизистонга бориш учун эмлаш сертификати мавжуд бўлса, манфий ПЦР тести сертификатига эга бўлиш шарт эмас. Эмланмаган фуқаролар эса мамлакат ҳудудига ПЦР тести сертификати билан кириши мумкин.
Расмий маълумотларга кўра, 11 февраль ҳолатига кўра, Қирғизистонда ҳар куни салкам 70 кишининг COVID-19 ва пневмония билан касалланиши ҳолатлари қайд этилмоқда.
