Маълум бўлишича "Biryuza Group" тўқимачилик корхонасида ёнғин содир бўлганлиги тўғрисида 11 январь соат 08:07 да ФВВга хабар келиб тушган.
Корхона 4 қаватли биносида жойлашган омборхонадаги хом ашё ва аксессуарлар ҳамда тикув цехидаги 500 тага яқин тикув машинкалар ёнган. Ёнғин бўёқ цехига ўтмаган.
Дастлабки тахминларга кўра ёнғин қисқа туташув натижасида юзага келган ва кўрилган зарар 5 млн.долларга тенг.
Ёнғин натижасида корхона ишчилари тезкорлик билан эвакуация қилинганлиги сабабли инсон ҳаётига хавф туғдирмаган, жабрланганлар йўқ.
Ҳозирда ёнғин оқибатларини бартараф этиш, унинг юзага келиш сабабларини ўрганиш бўйича текширув олиб борилмоқда. ФВВ томонидан ёнғин соат 15:05 да тўлиқ бартараф этилганлиги қайд этилган.
Корхонани ушбу қийин вазиятда қўллаб қувватлаш мақсадида «Узагросуғурта» компанияси томонидан зарарни қоплаб беришда Уюшма томонидан амалий ёрдам кўрсатиш чоралари кўрилди.
Корхонада 1500 нафар ишчи ишлаётганини ва ҳозирда улар даромадсиз қолганликларини инобатга олиб корхона ишчиларини вақтинчалик иш билан таъминлаш чоралари кўрилаётганини маълум қиламиз.
Ушбу ҳолатдан келиб чиқиб, қиш кунларида техника хавфсизлиги чораларини кўришни ва яна бир бор корхонада мавжуд носозликларни бартараф қилиш юзасидан профилактик текширув ўтказишни тўқимачилик корхоналари раҳбарларидан сўраймиз, дейилади "Ўзтўқимачиликсаноат" уюшмаси берган баёнотда.
