Унинг шартига кўра, иштирокчилар ўз ижод намуналарида боксчиларимизнинг суратларини акс эттиришлари лозим эди. Бугун Миллий олимпия қўмитасида ушбу танлов ғолиб ва совриндорларини тақдирлаш маросими бўлиб ўтди. Унда МОҚ Бош котиби Ойбек Касимов, МОҚ раиси ўринбосари, Ўзбекистон бокс федерацияси раисининг биринчи ўринбосари Сакен Полатов, Ўзбекистон Республикасида хизмат кўрсатган артист Рустам Сагдуллаев, Ўзбекистон Республикаси Бадиий академиясининг экспертларидан иборат ҳакамлар ҳайъати вакиллари ҳам қатнашишди.
Ушбу танловга 100 нафарга яқин кўнгилли ўз ишларини тақдим қилгани унга бўлган қизиқишнинг катта эканидан далолат беради. Очилиш маросимида сўзга чиққан Сакен Полатов иштирокчиларнинг барчасига мазкур танловда иштирок этганлари учун ташаккур айтиб, уларнинг келгуси ижодларига омад тилаб ўтди. Шундан сўнг ҳакамлар ҳайъати танлов учун тақдим қилинган суратларни синчковлик билан ўрганиб чиқишгач ғолиб ва совриндорларни аниқлаб олиш учун муҳокама қилишди.
Танлов якунига кўра, биринчи ўрин ҳаётнинг иродаси билан қўлларидан айрилган, бироқ оёқлари ёрдамида ижод қиладиган Лутфулла Қодировга насиб этди. Ушбу рассом танлов учун бир-биридан қизиқарли 5 та композиция топширган. Иккинчи ўрин Умар Ражабовга насиб этган бўлса, яна бир ёш рассом Лазиза Тўлаганованинг суратлари учинчи ўринга лойиқ кўрилди. Танлов шартига кўра, мусобақа ғолиби бокс бўйича Ўзбекистон терма жамоаси билан Токио-2020 Олимпия ўйинларида иштирок этиш учун йўлланма олган бўлса, қолган совриндорларга Ўзбекистон бокс федерациясининг эсдалик совғалари ва медаллари тақдим қилинди.
Шунингдек, тадбир якунида бир қатор рағбатлантирувчи номинациялар бўйича ҳам ғолиблар тақдирланишди.
