Муҳокамаларда мамлакатимизда норма ижодкорлиги фаолиятини янада такомиллаштириш, қонун ҳужжатларини содда ва тушунарли тилда тайёрлаш ҳамда бу жараёнларнинг ҳуқуқий асосларини мустаҳкамлаш муҳим аҳамият касб этаётгани таъкидланди.
Қонун лойиҳаси билан қонунчилик ҳужжатларида қўлланилаётган айрим тушунча ва юридик атамаларни ягона шаклда ишлатиш, уларнинг юридик-техник жиҳатдан тўғри баён этилишини таъминлаш назарда тутилмоқда.
Хусусан, қонунлардаги бир қатор хорижий атамаларни ўзбекча муқобиллари билан алмаштириш таклиф этилган. Жумладан, “аванс” сўзини “бўнак”, “маркировка”ни “тамғалаш”, “маршрут”ни “йўналиш”, “светофор”ни “йўлчироқ”, “коворкинг”ни “иш маркази”, “пароль”ни “ўрон”, “прогрессив” сўзини эса “илғор” деб ўзгартириш таклиф қилинмоқда.
Депутатлар қайд этганидек, мазкур қонун лойиҳасининг қабул қилиниши қонун ҳужжатларидаги тушунча ва юридик атамалар қўлланилишидаги ноаниқликларни бартараф этиш, уларни бир хиллаштиришга хизмат қилади.
Муҳокамалар якунларига кўра, қонун лойиҳаси депутатлар томонидан биринчи ўқишда қабул қилинди.
