“Қозоғистон Республикасининг Ўзбекистондаги Фавқулодда ва Мухтор Элчиси Бейбут Атамкулов жанобларини мамлакатимиздаги дипломатик миссияси якунланаётгани муносабати билан қабул қилдик, – деб ёзди Ўзбекистон ТИВ раҳбари ўзининг telegram-каналида. – Элчининг юртимиздаги фаолияти Ўзбекистон–Қозоғистон муносабатларида муҳим тарихий даврга тўғри келди. Хусусан, 2022 йил 22 декабрда давлатларимиз ўртасида Иттифоқчилик муносабатлари тўғрисидаги шартнома имзоланди.
Икки қардош мамлакат ўртасидаги дўстлик, яхши қўшничилик ва иттифоқчилик муносабатларини мустаҳкамлашга қўшган салмоқли шахсий ҳиссаси учун Элчи жанобларига самимий миннатдорлик билдирдик.
Дипломатнинг бу борадаги хизматлари Ўзбекистон Республикаси Президенти Шавкат Мирзиёев Жаноби Олийлари томонидан юксак баҳоланиб, “Дўстлик” ордени билан тақдирлангани алоҳида эътирофга лойиқ.
Элчи жанобларини Ўзбекистоннинг самимий дўсти ва ўз ишининг юксак профессионали сифатида қадрлаб қоламиз ва келгуси фаолиятида янги муваффақиятлар тилаймиз”.
Эслатиб ўтамиз, 2022 йилдан буён Тошкентдаги элчихонага раҳбарлик қилиб келаётган Бейбут Атамкуловнинг ўрнини Қозоғистон Президентининг 2026 йил 22 июлдаги фармони билан Ўзбекистонга элчи этиб тайинланган 63 ёшли Ерали Тугжанов эгаллайди.
