Таъкидланишича, мазкур қарор маҳсулотнинг номи ва уни тайёрлашнинг анъанавий технологиясини ҳуқуқий жиҳатдан ҳимоя қилиш, шунингдек, унинг ўзига хос сифати ва нуфузини сақлаб қолишга хизмат қилади.
Тарихий манбаларга кўра, Қўқон шаҳри қадимдан ҳунармандчилик ва миллий қандолатчилик ривожланган марказлардан бири ҳисобланади. Шу ҳудудда шаклланган Қўқон ҳалваси анъанавий тайёрлаш усули, ўзига хос таъми ва сифати билан нафақат Ўзбекистонда, балки хорижда ҳам эътироф этилган.
Географик кўрсаткич маҳсулотга қандай афзаллик беради?
Географик кўрсаткич сифатида давлат рўйхатидан ўтказилиши маҳсулотнинг маълум ҳудуд билан узвий боғлиқлигини расман эътироф этади. Бу эса унинг номидан фақат белгиланган талабларга жавоб берадиган ишлаб чиқарувчилар фойдаланишига ҳуқуқий асос яратади ҳамда маҳсулотнинг обрўси ва сифатини ҳимоя қилади.
Шунингдек, мазкур мақом маҳаллий ишлаб чиқарувчиларнинг рақобатбардошлигини ошириш, ҳудуднинг гастрономик брендини мустаҳкамлаш ва миллий маҳсулотларни ташқи бозорларда кенгроқ тарғиб этиш учун ҳам муҳим аҳамиятга эга.
Мутахассислар фикрича, географик кўрсаткичлар тизимини ривожлантириш мамлакатнинг миллий брендларини ҳимоя қилиш, гастрономик туризмни рағбатлантириш ва интеллектуал мулк объектларини самарали бошқаришда муҳим воситалардан бири ҳисобланади.
Маълумот учун, географик кўрсаткич — маҳсулотнинг муайян ҳудудга мансублигини ҳамда унинг сифати, шуҳрати ва ўзига хос хусусиятлари айнан шу ҳудуднинг табиий-иқлимий ёки ижтимоий-маданий омиллари билан боғлиқлигини тасдиқловчи интеллектуал мулк объектидир.
