Масалан, хизмат кўрсатиш тизимининг соддалаштирилгани — биргина экстерриториал тамойили, композит хизматлар, ФҲДЁ архив ҳужжатларининг рақамлашуви фуқароларга қулайлик туғдирмоқда. Бу эса мамлакатимизга ташриф буюраётган хорижликлар учун ҳам кенг имкониятлар очмоқда.
Яна бир масала, Самарқанд нафақат ўзининг боқий ва бетакрор тарихий мажмуалари, балки мазали таомлари билан ҳам дунёга машҳур. Аслини олганда мазкур жуфтликни Самарқандда бирлаштирган ҳам шу. Маршалл ва Эбру ўзбек миллий таомларини жуда яхши кўришади. Буни қарангки, уларнинг муҳаббат тарихи ҳам ўзбек таомларидан бошланган.
Қандай дейсизми, кунларнинг бирида Эбру Маршалдан велосипедда келишни сўрайди. Улар йўл бўйлаб суҳбатлашишади ва Эбру Маршални "Бригҳтон - Беач" даги ўзининг севимли ўзбек ресторани ҳисобланган "Наргис Cафé" сига таклиф қилади. Буни қарангки, Маршалл ҳам ўша ўзбек ресторанининг мухлиси эди. Энг муҳими, бу ўзига хос учрашув 4 июл санасида бўлиб ўтган. Шу боис ҳам жуфтлик ҳаётидаги ушбу муҳим кунни айнан ушбу сана ва айнан Самарқандда нишонлашга қарор қилишди.
Сўнгги икки йил ичида иккаласи ҳам янги истиқболли иш топишди. Улар ҳатто Туркияда зайтун боғини сотиб олишди ва шу йилнинг сентябр ойида тўй қилмоқчи. Бўлиб ўтадиган катта тўйида меҳмонларга ўзларининг зайтун мойларини беришни режалаштиришган.
Тўй маросимининг ўтказилиш жойи ҳақида савол туғилганда, ёшлар узоқ вақт ўйлаб ўтиришмади. Ахир, бир неча йил олдин Самарқандда бўлган Маршалл шаҳар тарихи ва меъморчилигига ошиқ бўлган. Шу сабаб ҳам улар Регистонни танлашди. Уларнинг наздида Самарқанд абадийликни акс эттирадиган мўъжизакор жойдир, деб ёзмоқда Adliya yangiliklari телеграм канали.
