Бу ҳақда «Дунё» АА хабар берди.

Қайд этилишича, мазкур жараён Бош консулхона дипломатларининг Россиянинг ваколатли давлат идоралари билан узоқ вақт давомида олиб борган музокаралари, яқин ҳамкорлиги ҳамда зарур консуллик-ҳуқуқий тадбирларни амалга ошириши натижасида ташкил этилган.

Жараён давомида вояга етмаган болаларнинг Ўзбекистон фуқароси экани, мамлакатимизда яқин қариндошлари бор-йўқлиги ва уларнинг яшаш шароитлари ўрганилган. Шунингдек, зарур ҳужжатлар расмийлаштирилиб, болаларни Россиядан Ўзбекистонга олиб келиш билан боғлиқ ташкилий масалалар ҳал этилган.

Амалга оширилган чора-тадбирлар натижасида Мордовия Республикасидаги жазони ижро этиш муассасаси ҳузуридаги болалар уйида тарбияланаётган вояга етмаганлар Бош консулхона дипломатлари ҳамда Ўзбекистондан махсус сафарбар этилган Ички ишлар вазирлиги ходимлари ҳамроҳлигида юртимизга олиб келинган.

Маълум қилинишича, Бош консулхона томонидан Россиядаги жазони ижро этиш муассасалари ҳузуридаги болалар уйларида тарбияланаётган ўзбекистонлик ёш болаларни репатриация қилиш тадбирлари тизимли равишда амалга оширилмоқда.

Натижада Россияда бўлган вояга етмаган Ўзбекистон фуқаролари Ватанига қайтарилмоқда.