Меҳнат мигрантларига етарли шарт-шароит яратиш, уларни хорижда хавфсиз ва кафолатланган иш билан таъминлаш, саломатлиги ва ҳаётини ҳар турли кўнгилсизликлардан сақлаш мақсадида кейинги йилларда қатор ишлар қилинмоқда. Президентимизнинг 2020 йил 15 сентябрдаги «Хавфсиз, тартибли ва қонуний меҳнат миграцияси тизимини жорий қилиш чора-тадбирлари тўғрисида»ги қарори бу борадаги ишларни янги босқичга кўтарди. Натижада чет элга қатнаб ишлаётган фуқароларга нисбатан муносабат тубдан ўзгариб, меҳнат мигрантлари билан мулоқот ўрнатилаётгани, уларнинг муаммо ва эҳтиёжларини ўрганиш ҳамда ҳал қилиш бўйича янги тизим жорий қилингани бу тоифа юртдошларимиз учун кўпдан кутилган воқелик бўлди.
Хусусан, хорижда ишлаётган шахсларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси ташкил этилиб, меҳнат мигрантларининг ҳаёти ва соғлиғини суғурталаш, уларнинг оила аъзолари учун ипотека кредитларини ажратиш амалиёти жорий қилинди. Шу қаторда, чет элга қатнаб ишлаётган юртдошларимизни қўллаб-қувватлаш механизмларини такомиллаштириш, мусофирчиликдан қайтган фуқароларнинг реинтеграциясини таъминлаш, уларнинг тадбиркорлик фаолияти билан шуғулланиши учун қулайлик яратишга доир комплекс чора-тадбир кўрилмоқда.
Шунингдек, ташқи меҳнат миграциясидаги ваколатли органлар фаолиятини такомиллаштириш, хорижда ишламоқчи бўлган шахсларни талаб юқори бўлган касбларга ўқитиш, фуқароларнинг чет элда бўлиш даврида ҳуқуқларини ҳимоя қилиш, қайтиб келган меҳнат мигрантларининг бандлигини таъминлаш, улар оила аъзоларини ижтимоий қўллаб-қувватлаш диққат марказида.
Чет элга қатнаб ишлашга қарор қилган меҳнат мигрантлари учун Россия Федерациясининг «РЖД Строй» акциядорлик компанияси томонидан бир неча шартлар асосида юқори маош, кафолатланган иш ўрни таклиф этилмоқда. Бу борада акциядорлик компанияси мамлакатимиздан ишлашга бораётган ҳаваскорлар ўртасида танлов эълон қилган.
«РЖД Строй» корхонасининг талабномасига асосан, Бухоро Архитектура ва қурилиш коллежи биносида ошпазлик, ҳайдовчилик ва қурилишнинг қатор йўналишлари бўйича ишлаш истагидаги фуқаролар иштирокида танлов тадбирлари ташкил этилди. Унда Ўзбекистон Республикаси Президентининг жорий йил 25 январдаги «Вақтинчалик меҳнат фаолиятини амалга ошириш учун хорижий давлатга кетаётган шахсларни ва банд бўлмаган аҳолини ўқитишни ташкил этиш бўйича қўшимча чора-тадбирлар тўғрисида»ги қарори дастуриламал вазифасини ўтамоқда. Танловда иштирок этган талабгорлар, касб-ҳунарга ўқиётганлардан ташқари яна 200 дан ортиқ ҳаваскор ёшга иш берувчи, яхшигина ойлик маош таклиф этаётган буюртмачи корхона вакили томонидан иш тартиби, яратилган шарт-шароит, ҳужжатларни расмийлаштириш, меҳнатга ҳақ тўлаш тартиби тўғрисида батафсил маълумот берилди.
Танловдан олдин Россиянинг «РЖД строй» компанияси департаменти бошлиғи Светлана Муравёва 7 июль куни вилоят ҳокимлигида бўлиб, вилоят ҳокимининг биринчи ўринбосари Нозимжон Холмуродов билан учрашди. Вилоят Бандлик бош бошқармаси бошлиғи Анвар Ҳамроев, Ташқи меҳнат миграцияси агентлиги вилоят филиали раҳбари Анвар Ҳамдамов иштирокида ўтган музокарада икки томонлама имзоланган келишув битими шартлари, меҳнат мигрантларига хорижда яратилган шарт-шароит хусусида ахборот берилди. Учрашувда вилоятда ўтказилаётган танловда иш берувчилар томонидан танлаб олинган фуқароларни хорижга жўнатишдан олдин комплекс тиббий кўрикдан ўтказиш, янгича муҳитга кўниктириш, хавфсиз ва кафолатланган иш билан таъминлаш масаласи муҳокама қилинди, деб хабар беради вилоят ҳокимлиги матбуот хизмати.
