Кутилаётган ҳосилдорликка эришиш учун озуқа базаси зарур. Корхоналар томонидан йилдан-йилга ялпи ҳосилни ошириб бориш режалаштирилган. 2021 йилда 472,4 гектар майдонда тутзорлар барпо этилди. Самарқандлик пиллакорлар “Яшил макон” умуммиллий ҳаракати доирасида тут кўчатлари экиш ва янги тутзорлар барпо этишга муносиб улуш қўшиб келишмоқда.
Ҳар бир йирик пиллачилик кластери томонидан бириктирилган туманларда 1 миллион тупдан тут кўчатлари экилади. Далада ерларни тайёрлаш имкони туғилиши билан тут кўчатларини экиш ишлари бошлаб юборилган. Тутзорларни барпо этиш усуллари ва тут кўчатларини экишда амал қилиниши лозим бўлган агротехник тадбирлар бўйича Булунғур туманидаги агрофирмада ташкил этилган семинарда фермер хўжалиги раҳбарлари, пиллачилик кластерлари ва уларнинг касаначиларига соҳанинг етук мутахассислари томонидан тутчилик бўйича керакли кўрсатмалар берилди.
“Ўзбекипаксаноат” уюшмаси бошқарув раисининг ўринбосари Шуҳрат Абдулазизов, вилоят "Агропилла" МЧЖ раиси Э.Раҳмонов, Булунғур тумани ҳокимининг қишлок хўжалик масалалари бўйича ўринбосари, туманнинг ташкилотлари раҳбарлари иштирок этган семинарда тут плантанциялари ва якка тартибда қаторлаб экиладиган тутларни парвариш технологиялари, агротехник тадбирлар ҳақида сўз юритилди.
Шунингдек, 7 гектарлик тутзорлар иш билан банд бўлмаган аҳоли вакилларига бўлиб берилди ва тут қатор ораларида қишлок хўжалик экинларини етиштириш бўйича тавсиялар тақдим этилди.
Туманнинг Алишер Навоий ҳудудидаги 7 гектарлик ер майдонининг янги барпо этилаётган 3 галик кисмига 15 минг туп серҳосил тут кўчати экиш ишлари бошлаб юборилди. Семинар иштирокчилари мазкур жараённи кузатиб, тут экишнинг янги усуллари билан танишди.
