Бу ҳақда MY5 телеканалида хабар берилди.
Қайд этилишича, бола йиғисини эшитган шифокорлардан бири шу атрофда жойлашган туман 1-сон ИИБ бўлими профилактика инспекторларидан ёрдам сўраган. Чақалоқ 2 соат мобайнида чуқуқрликда қолиб кетган. Уни узоқ уринишлардан сўнг ички ишлар органлари ходимлари чиқариб олган.
«Туйнукни ковлаган сари чақалоқ овози эшитилмай қолаётганди. Кейин ҳамма ҳодимлар биргаликда ковлашди, тоғли ҳудуд бўлгани учун ер қаттиқ эди. Ҳамма ходимлар киришга тайёр бўлиб турганди, фақат туйнук бироз кичик бўлгани учун мен кирдим. Чақалоқ ёнбош ҳолатда эди, оёғи ва қўли қимирламай қолганди. Чиқариб, дарров биринчи тиббий ёрдам кўрсатиш учун ҳамшираларга бердик», — дейди чақалоқни олиб чиққан профилактика инспектори Сардор Сафаров.
Бола 1 март куни соат 12:00 атрофида туман марказий шифохонасига олиб борилган. Айни пайтда унинг ҳолати қониқарли ҳамда шифокорларнинг доимий назорати остида махсус интенсив хонада парваришланмоқда.
«Келганида бола жуда ҳам музлаб қолганди. Ҳозирда аҳволи анча тузук. Онаси ҳам ўзини яхши ҳис қиляпти, берган саволларимизга яхши жавоб беряпти», — дейди шифокор Фармон Қўшмуродов.
Лавҳада айтилишича, она бешинчи фарзандига ҳомиладор бўлганини ўзи пайқамаган. Соғлиғидан шикоят қилиб келган аёл буни фарзанди туғилгандагина билган.
Тармоқларда тарқалган хабарга кўра, аёл ҳожатхонага кирганида кўзи ёриган ва ҳолсизланган ҳолда чақалоғини эҳтиётсизлик билан ҳожатхона тешигига тушириб юборган.
«Қорнимда бўлганини билмаганман, ростан. Қимирлаганини ҳам, умуман, сезмаганман. Токсикоз ҳам бўлмаганман. Поликлинакага шу пайтгача бирор марта борганим йўқ, бўйимда бор, деб мурожаат ҳам қилганим йўқ эди. Тоғда кийикдек сакраб юрганман. 3 кг 700 грамм туғибман, камроқ ҳам эмас. Наҳотки, билмаганман?», — дейди аёл.
Чақалоққа уни қутқариб қолган ИИО ходимининг исмини қўйишмоқчи.
