Бу ҳақда Санитария-эпидемиология қўмитаси хабар қилди.
Маълум қилинишича, 2026 йилнинг 1-чорагида республика бўйича жами 174 та ҳолат рўйхатга олинган бўлиб, уларнинг 168 нафари 14 ёшгача бўлган болалар ҳиссасига тўғри келади.
Шу муносабат билан аҳоли, айниқса болалар орасида касаллик тарқалишининг олдини олиш бўйича қатор профилактик чоралар амалга оширилмоқда.
Маълум қилинишича, жами 8024 доза вакцина харид қилиниб, беморлар билан мулоқотда бўлган 4862 нафар фуқаро эмлаш билан қамраб олинди. Вакцина олишга тиббий монелиги мавжуд шахсларга эса шифокорлар назорати остида кимёвий профилактика тадбирлари ўтказилмоқда.
Касаллик динамикасига кўра, апрель ойида март ойига нисбатан ҳолатлар 14 фоизга камайгани кузатилган.
Мутахассислар таъкидлашича, менингит — бош ва орқа мия пардалари яллиғланиши бўлиб, тез ривожланиши ва оғир асоратлар келтириб чиқариши билан хавфлидир.
Шу муносабат билан аҳолига қуйидагилар тавсия этилади:
- ўз вақтида эмланиш;
- шахсий гигиена қоидаларига қатъий риоя қилиш;
- касаллик аломатлари кузатилганда зудлик билан шифокорга мурожаат қилиш;
- жамоат жойларида эҳтиёт чораларини кўриш;
- “Ҳаж” ва “Умра” сафарларидан олдин менингококк инфекциясига қарши эмланиш ва сафардан сўнг оммавий тадбирларда иштирокни чеклаш.
Санитария-эпидемиология хизмати мамлакатда эпидемиологик вазият барқарорлигини сақлаш мақсадида кенг кўламли ишлар амалга оширилаётганини маълум қилди.
