Олий Мажлис Қонунчилик палатасида “Ўзбекистон Республикасининг Фуқаролик процессуал кодексига қўшимча ва ўзгартишлар киритиш ҳақида”ги қонун лойиҳаси биринчи ўқишда муҳокама қилинди. Бу ҳақда Олий Мажлис Қонунчилик палатаси ахборот хизмати хабар берди.
Таъкидланганидек, қонун лойиҳаси билан Фуқаролик процессуал кодексида янги институт жорий этилмоқда. Унга кўра, соддалаштирилган тартибда иш юритиш агар даъвонинг баҳоси юридик шахсларга нисбатан – базавий ҳисоблаш миқдорининг йигирма бараваридан, якка тартибдаги тадбиркорларга нисбатан эса – ўн бараваридан, фуқароларга нисбатан эса – беш бараваридан ошмаса, даъво аризалари бўйича ишлар соддалаштирилган иш юритиш тартибида кўриб чиқилиши лозимлиги белгиланмоқда.
Шунингдек, соддалаштирилган иш юритиш тартибидаги иш даъво аризасини иш юритишга қабул қилиш ва иш қўзғатиш ҳақида ажрим чиқарилган кундан эътиборан йигирма кундан ошмаган муддатда кўриб чиқилиши кўзда тутилмоқда
Депутатларнинг қайд этишича, бугунги кунда соддалаштирилган тартибда иш юритиш институти иқтисодий судларга жорий этилганлиги ўзининг ижобий натижасини берди. Тадбиркорлик субъектларининг, шу жумладан юридик шахсларнинг ҳуқуқ ва эркинликлари ҳамда қонуний манфаатлари судларда ортиқча вақт ва харажатларни сарфланмасдан тезроқ ҳимоя қилинишига эришилмоқда.
Қонун лойиҳасининг қабул қилиниши “Бизнес юритиш” индексининг Контрактлар ижросини таъминлаш индикаторида юртимизнинг ўз кўрсаткичлари яхшиланишига, тадбиркорлик субъектларининг, шу жумладан юридик шахсларнинг одил судловга эришиш даражасининг оширилишига ва уларнинг ортиқча сарф-харажатлари тежалишига хизмат қилади.
