Хасталик ногиронликнинг оғир шакли ҳамда ҳаракат чекланиши билан боғлиқ. Бинобарин, у ирсий касалликлар туфайли болалар ўртасида содир бўладиган ўлим ҳолатларининг энг кенг тарқалган омилларидан биридир.
Шу муносабат билан Cоғлиқни сақлаш вазирлиги билан “СМА УМИД” нодавлат-нотижорат ташкилоти ҳамкорлигида ушбу ирсий касалликка чалинган болаларга кўрсатилаётган тиббий хизмат мавзусида матбуот анжумани бўлиб ўтди.
— Эҳтиёжманд фуқароларимизга ғамхўрлик кўрсатиш жамият ва давлатнинг бағрикенглиги ифодасидир. Айни пайтда Ўзбекистонда 93 нафар СМА касаллигига чалинган бемор мавжуд. Мамлакат раҳбарининг тегишли қарори қабул қилинган вақтда рўйхатда турган 76 нафар беморни июнь ойидан бошлаб дори воситалари билан бепул таъминлаш бўйича давлат дастури кучга кирди. Ҳужжат имзолангандан кейин яна 17 нафар бемор аниқланди. Ҳадемай улар ҳам спинал мушак атрофияси клиник диагнозига эга бўлган оилаларнинг Ягона миллий регистрига киритилиб, давлат дастуридан фойдаланиш имкониятига эга бўлади. — дейди Соғлиқни сақлаш вазири ўринбосари Элмира Баситханова.
Статистик маълумотларга кўра, СМАга чалинган беморларнинг тўртдан бир қисмини ўзаро яқин қариндошлар ўртасидаги никоҳдан дунёга келган ўғил-қизлар ташкил этади. Бу ҳақида Соғлиқни сақлаш вазирлиги хабар бермоқда.
