Кеча мусобақанинг навбатдаги куни аёллар ўртасидаги беллашувлар ўтказилиб, бугун финал блокида медаллар учун гиламга чиқадиган жуфтликлар номи маълум бўлди.
Қувонарлиси, улар орасида ҳамюртимиз Светлана Окназарова ҳам бор. 72 килограмм вазн тоифасида юртимиз шарафини ҳимоя қилаётган курашчи-қизимиз илк даврада польшалик Патрисия Сперкани 7-0 ҳисобида енгди. Афсуски, чорак финалда қозоғистонлик рақибасига имкониятни бой бериб қўйди. Жамила Бакбергенова финалга йўл олгани боис, Окназарова бронза медали учун курашиш ҳуқуқини қўлга киритди. Унинг рақибаси руминиялик Александра Анхель бўлади.
Яна бир курашчимиз Лайлохон Собирова ҳам 1/4 финалга етиб келди. Фақат уни ушбу босқичда таслим этган мўғулистонлик Даваачимег Ерхембайар финалга чиқа олмади. Натижада 57 килограмм вазндаги Собирова жаҳон чемпионатини 1/4 финалда якунлади.
Эслатиб ўтамиз, у илк босқичда мексикалик Алма Эскотони таслим этган эди.
