Россия Федерацияси Саноат ва савдо вазирлиги раҳбари Денис Мантуров “Известия” газетасига берган интервьюсида маҳаллий компаниялар 2021 йил февралдан бошлаб COVID-19га қарши вакцина ишлаб чиқаришнинг максимал ҳажмига эришишни режалаштираётганини айтди.
Вазирлик ҳисоб-китобига кўра, октябр ойида 500 минг дона, шу йил охиригача эса 2-3 миллион дона “Спутник V” ишлаб чиқарилади.
Мантуровнинг сўзларига кўра, ишлаб чиқарилгандан кейинги ҳар бир босқичда вакцина фуқаролик муомаласига чиқариш учун бир қатор зарур тадқиқотлар ўтказилади.
Бундан ташқари, коронавирусга қарши Россия вакцинасини бошқа мамлакатларга етказиб бериш мавжуд корхоналар асосида чет элда қўшма корхоналар ташкил қилишни назарда тутади. Шу билан бирга, минглаб ва юз минглаб дозаларни етказиб бериш ички бозор учун “оғриқсиз” амалга оширилади, деб таъкидлади Денис Мантуров.
11 август куни Россия дунёда биринчи бўлиб Гамалея илмий-тадқиқот маркази ва Россия тўғридан-тўғри инвестиция жамғармаси томонидан ишлаб чиқарилган “Спутник V” вакцинасини рўйхатдан ўтказди. Ҳозирги вақтда препарат синовларнинг учинчи, якуний босқичидан ўтмоқда, унда 40 мингга яқин кўнгиллилар қатнашади.
