Бутунжаҳон бокс иттифоқи профессионал бокснинг энг нуфузли йўналиши ҳисобланиб, унга 1963 йилда асос солинган. Унинг штаб-квартираси, яъни бош қароргоҳи Мексиканинг Мехико шаҳрида жойлашган. Ўтган йили ташкилотнинг юбилей - 60 йиллик Конвенцияси Мексикада ўтказилган ва айнан ўша тадбирда 61-Конвенция мезбонлиги Тошкент шаҳрига ишониб топширилганди.
Ушбу нуфузли маросимда британиялик боксчи супероғир вазн тоифасида амалдаги WBC чемпиони Тайсон Фьюри ҳам иштирок этади. Бокс афсонасининг юртимизга ташрифини WBC ҳам ўз расмий сайтида тасдиқлади.
Дунёга машҳур The Ring журнали (2015—2018; 2020—2022) томонидан "Йил боксчиси" деб топилди. 2018 йилда "Йил қайтиши" номинацияси ғолиби бўлган. 2015, 2018 ва 2019 йилларда BoxRec талқинига кўра "Йил боксчиси" дея тан олинган. Фьюри 2015 йилда украиналик жаҳон чемпиони Владимир Кличкони мағлуб этишни уддалаган. 2020 йилда эса америкалик Деонтей Уайлдерни енгиб, энг нуфузли йўналиш - WBC чемпионлик камарини қўлга киритган.
Мағлубият нималигини билмай келаётган Тайсон Фьюри профессионал боксдаги фаолияти давомида 35 ғалаба (24 нокаут) ва 1 дуранг қайд этган. Илк жангини 2008 йилнинг декабрида венгриялик Бел Дьендьешига қарши ўтказиб, рақибини биринчи раунддаёқ нокаутга учратган.
