Эрталабдан “Болажон” боғидаги майдонда спортчини кутиб олиш учун кичик ёшдаги спортсевар болалардан тортиб ёшлар, кексалар, турли жамоат ташкилотлари вакиллари, Сурхон элининг алп ўғлонининг ютуғидан қалбида фахр, кўксида ғурур туйган борки жам бўлишди.
Тадбирда вилоят ҳокими Тўра Боболов спортчига “Scoda” русумли автомобиль калитини тантанали равишда топширди ва бугун сурхон элида улғаяётган ҳар бир ўғлон Баҳодир Жалоловнинг ютуғидан улгу олиб ўсишини, бундай ҳавас эса воҳаликлар орасида катта ютуқларни қўлга киритадиган, эртасига ишонч билан боқадиган фарзандлар сафи кўпайишини таъкидлади.
Боксчи сўз олар экан, воҳадошларининг қўллаб-қувватлови унга ҳамиша куч беришини, янги чўққилар сари етаклашини айтди.
Майдонда тўпланганларнинг нигоҳида биргина самимият, фахр ва ҳавас борлигини фаҳмлаш қийин эмас. Чунки фарзанди дунёни забт этишини истайдиган оналар, оталар кўп. Зеро, ана шундай чемпионларни тарбиялаш учун эса юрагида ўти бор, фарзанди ҳақиқатдан руҳлантира оладиган оналар керак.
Тадбирдан сўнг, спортчи ўз она қишлоғи Сариосиёга жўнаб кетди. У ерда ҳам спортчини ўзгача руҳ, ўзгача кайфиятда муносиб кутиб олишди.
Усмонали НОРМАТОВ,
“Янги Ўзбекистон” мухбири
