Бугунги кунда мамлакатимиз олий таълим тизими изчил ўзгаришлар рўй бераётган соҳалардан бири ҳисобланади. Юртимизда сўнгги йилларда 64 та янги олий таълим муассасаси ташкил этилгани, қабул квоталарининг йил сайин кўпаяётганининг ўзиёқ фикримизга ёрқин мисолдир. Айниқса, чет элнинг нуфузли университет, институтлари филиалларининг очилаётгани юртимизда олий таълимнинг даражасини оширишга хизмат қиляпти.
Ҳозир Ўзбекистон Республикасида хорижий олий ўқув юртларининг 20 дан ортиқ филиали мавжуд. Улар орасида Тошкент шаҳридаги Турин политехника университетининг ўзига хос ўрни бор. Бу таълим муассасасининг асосий вазифаси ўқув, илмий ва ишлаб чиқариш интеграциясини таъминлаш, шунингдек, мамлакатимизда машинасозлик ва автомобилсозлик саноатини ривожлантириш учун юқори малакали мутахассислар тайёрлашга қаратилган.
Университет Италия билан ҳамкорликда очилган ва Европа таълим тизимини тўлиқ ўзида мужассам этган. Биз муҳандисларни машинасозлик технологияси, автомобилсозлик муҳандислиги, саноат ахборот технологияси ва ахборот бошқарув тизими, саноат-хўжалик қурилиши ва архитектура соҳалари бўйича ўқитамиз. Бутун ўқув жараёни Европанинг кредит кўчириш ва жамғариб бориш тизими бўйича инглиз тилида олиб борилади.
Университет ташкил этилганда асосий мақсад сифатида мамлакатимизда автомобилсозлик учун кадрлар тайёрлаш режалаштирилган эди. Ҳозирги вақтда битирувчиларнинг ишга жойлашиш соҳаси кенгайган. Биз тайёрлаган мутахассислар “Ўзавтосаноат” акциядорлик жамиятининг кўплаб корхоналарида ишлаяпти.
Бундан ташқари, нефть ва газни қайта ишлаш саноати корхоналарида ишлаб чиқариш жараёнига жалб қилинган мутахассисларнинг асосий қисмини университетимиз битирувчилари ташкил қилади. Шунингдек, битирувчиларимизга қурилиш компаниялари ва хорижий корхоналарда талаб катта. Университетимизни битирган кўплаб мутахассислар ихтисослаштирилган давлат ташкилотлари, вазирлик ва идораларда ишлайди. Таъкидлаш жоизки, битирувчиларнинг кўпи шу билан чекланиб қолмайди ва илм-фан билан шуғулланади.
Ҳозирги вақтда автомобилсозлик соҳасида робототехника ва мехатроника соҳасидаги лойиҳалар амалга оширилмоқда. Шунингдек, талабалар электромобиллар, электр автобуслар, шунингдек, ҳайдовчисиз транспорт воситаларининг намуналарини тайёрлашди. Мисол тариқасида айтиш мумкинки, биз ҳайдовчисиз автомобилнинг лойиҳасини ишлаб чиқдик. У туризмда кенг қўлланиши мумкин. Бундай машина сайёҳларни тарихий меъморий обидалар ўртасида таший олади. У GPS харита ва навигатор ёрдамида бошқарилади. 2018 йилда ушбу лойиҳа республика инновацион ғоялар танловида энг яхши лойиҳа деб тан олинди.
Сўнгги пайтларда дастурий маҳсулотлар сони ҳам ошди. Бу лойиҳалар асосан стартап кўринишида бўлгани учун дастлаб университетнинг махсус жамғармаси томонидан молиялаштирилади. Белгиланган рентабеллик даражасига етгач, тижорат асосида молиялаштиришга ўтказилади.
Италиянинг Турин политехника университети QS жаҳон университетлари рейтингида 334-ўринни эгаллайди. Қолаверса, Ўзбекистоннинг 10 та олий таълим муассасаси қаторида Тошкент шаҳридаги Турин политехника университети ҳам Times Higher Education томонидан дунёнинг нуфузли олийгоҳлар қаторига кириш учун номзод сифатида эътироф этилди. Бу университетнинг дипломи дунёда тан олинади. Университетимизнинг ҳар бир битирувчиси ушбу дипломни олгани учун билимининг сифат даражаси анча юқори.
Бундан ташқари, Тошкент шаҳридаги Турин политехника университети битирувчиларига ҳам Ўзбекистоннинг, ҳам Италиянинг дипломлари топширилади. Бундай дипломга эга бўлган ёшлар дунёнинг исталган йирик компанияларида ишлаш имкониятига эга бўлади.
Ўқитиш жараёни Италиядан юборилган профессор-ўқитувчилар томонидан олиб борилади ҳамда имтиҳонлар қатъий назорат қилинади. Таълим сифати ҳам ҳамкорларимиз томонидан белгиланади.
Олий таълим муассасамизда талаба алмашинув дастури бор. Малака танловидан сўнг талабалар Италияга ўқиш ва амалиёт ўташ учун юборилади. Талабалар учун Масерати, Фиат, Феррари каби қатор йирик компанияларда амалиёт ўташ имконияти мавжуд.
Ҳозир талабаларимиз умумий контингентининг 4 фоизи чет элликлардан иборат. Улар Туркия, Россия, Италия, Қозоғистон ва бошқа қўшни давлатлардан келган. Сўнгги пайтларда чет эллик талабалар сонини кўпайтириш учун кўпроқ тадбирлар ташкил қиляпмиз. Натижа ёмон эмас, хорижий талабалар сони йилдан йилга ортмоқда.
Профессорлар таркибини шакллантириш жараёни Италия томонидан ҳал қилинади. Ҳозир педагогларимизнинг 40 фоизи италиялик ва қолгани маҳаллий профессор-ўқитувчилардир. Ишга қабул қилинган маҳаллий ўқитувчилар Италия томонидан аккредитацияланади. Улар ўз илмий даражасини нуфузли хорижий комиссия олдида исботлаши керак. Шундан кейингина улар билан 3 йилга шартнома тузилади. Италия томонидан тақдим этилган сертификат туфайли маҳаллий ўқитувчилар Европада дарс бериш имкониятига эга бўлди.
Муассасамизда илмий ишлар бўйича икки нафар италиялик проректор фаолият юритади. Келгусида Италия томони билан келишган ҳолда бошқа хорижий давлатлардан ҳам малакали мутахассисларни жалб қилишни режалаштирганмиз.
Ҳозирга қадар ўқув жараёнини италиялик ҳамкорларимиз билан келишган ҳолда олиб бордик. Энди Италиядаги мавжуд ўқув платформасини маҳаллийлаштиришга ўтамиз. Яъни ўқитиш, ўқитувчилардан онлайн ва офлайн маслаҳат олиш каби жараёнларни ўзимиз ташкил қиламиз ва бошқарамиз.
Университет битирувчиларининг бир йил давомида ишга жойлашиши жуда муҳим ва рағбатлантирувчи фактдир. Ташкил этилганидан буён олий таълим муассасамизни 900 дан ортиқ талаба битирган. Статистика шуни кўрсатадики, рўйхатдан ўтган талабаларнинг атиги 60–70 фоизи ўқишни тугатади. Бу фактга асосланиб, университетимизда ўқиш нечоғлик мураккаблигини баҳолаш мумкин.
Битирувчиларимиз учун асосий иш берувчилар халқаро компаниялардир. Яъни чет элликлар иштирокида ташкил этилган компания ва корхоналар университетимизда тайёрланган мутахассисларни ишга таклиф қилади. Шунингдек, хорижий компаниялар ҳам биз билан ҳамкорлик қилиш истагини билдирди. Яқинда Россиянинг РБC банки талабаларимиз билан янги лойиҳани бошлади. Унга кўра, банк тизимини тўлиқ автоматлаштириш бўйича ишлар талабаларимиз ва профессор-ўқитувчиларимиз томонидан бажарилади.
Университетимизнинг маркетинг бўлими мунтазам изланишда. Қайси соҳаларда мутахассисларга эҳтиёж ортиб бораётганини кўриб чиқяпмиз. Олинган маълумотларга асосланиб, дастурий инжиниринг, архитектура ва дизайн йўналиши бўйича мутахассислар тайёрлаш билан шуғуллана бошладик. Бу — шахсий ташаббусимиз, Италия томони билан келишувлардан ташқарида. Бу ташаббусни амалга ошириш учун чет элдан кучли мутахассисларни жалб қиляпмиз.
Бундан ташқари, иқтидорли ёш ватандошларимизни, шунингдек, чет элда таҳсил олган йигит-қизларни ушбу соҳаларда ҳамкорликка таклиф қиламиз.
Келгуси беш йилда Тошкент шаҳридаги Турин политехника университетини дунёнинг энг кучли 1000 та университети рўйхатига киритишни режалаштирганмиз. Кейинги мақсадимиз профессор ва талабалар сонини кўпайтириш, университет имкониятларини янада кенгайтиришга қаратилади. Илмий изланиш билан шуғулланиш истагидаги битирувчиларимиз учун магистратура ва докторантурага қабул квотасини ошириш ҳам режамиздан жой олган.
