Айнан ўша пайтда собиқ жаҳон чемпиони рингга қайтишини эълон қилиб, «ҳар қандай боксчи билан жанг қилишга тайёр»лигини эълон қилганди.
Шундан бери унинг айнан ким билан ва қаерда муштлашиши масаласи шов-шувли тарзда муҳокама этилаётганди. 21 июль куни Boxingscene сайти темир Майк кичик Рой Жонс билан жанг олиб бориши ҳақидаги хабарни тарқатди. Фақат учрашув санаси ҳамда жойи савол остида қолаётган эди.
Lenta.ru сайтининг ёзишига кўра, Тайсон ва Жонс ўртасидаги жанг 12 сентябрь куни АҚШнинг Калифорниясида ўтказилади. Жанг Triller ижтимоий тармоғи орқали кенг жамоатчиликка намойиш этилади. Учрашув 8 раунддан иборат бўлиб, мусобақа кўргазмали тарзда ташкиллаштирилади.
Бугун Майк Тайсон TMZ нашрига берган интервьюсида “жангга жиддий ҳозирлик кўраётганлигини таъкидлаб, 6.5 км масофага чопаётганини, машғулотларни бир маромда олиб бораётганини ва доимий одатига кўра шиддаткор жанг олиб боришга тайёрлигини билдирган. Шу билан бирга у «мен профессионал рингга пул ёки бошқа мақсадларни кўзлаб қайтаётганим йўқ. Бирдан бир ниятим хайрия мақсадларни амалга ошириш. Шунинг учун мени бой бўлиб кетади, Тайсон катта маблағларни қўлга киритади, деб хавотирланманг», дея иқтибос келтирган.
Ўз навбатида Жонс 54 ёшли «кекса боксчи» билан муштлашиш унга завқ бағишлашини айтган.
Маълумот учун: Тайсон сўнгги бор 2005 йили профессионал бокс мусобақасида қатнашган эди. Профи боксда 66 бор ғалабага эришган жаҳон чемпиони Жонс эса 2018 йили катта ринг билан хайрлашганди.
Тўлқин РЎЗИЕВ.
