Қатар пойтахти Доҳада давом этаётган M 15 мусобақаси яккалик баҳсларида ҳамюртимиз Ҳумоюн Султонов 1/16 финал доирасида ҳиндистонлик Вивек Коллуруга қарши кортга чиқди. Икки сет давом этган баҳсда ҳамюртимиз ортиқча қийинчиликсиз ғалабага эришди: 6:0, 6:1.
Эндиликда нимчорак финал босқичида Ҳумоюн Султоновга нидерландиялик Найлс Вискер рақиблик қилади.
Бугун шунингдек, икки кундан буён кечиктирилаётган Максим Шин/Пол Ворнер баҳси ўтказилиши кутилмоқда. Мазкур баҳс Тошкент вақти билан 14:00 да бошланиши режалаштирилган.
Эслатиб ўтамиз, яна бир истеъдодли теннисчимиз Нигина Абдураимова эса Австралия очиқ чемпионатини муваффақиятли бошлаб, афсуски, саралашнинг иккинчи босқичида юришини тўхтатган эди. Теннисчимиз ушбу босқичда америкалик Кэти Волинецга имкониятни бой берди.
2 соат 28 дақиқа давом этган ўйин тақдири 3 сетда ҳал бўлди: 6:1, 4:6, 7:6 (10:4). Қайд этиш жоиз, Абдураимова учинчи сетда 2 бор матчболни бартараф этиб, баҳсни тай-брейккача олиб бора олди. Бироқ теннис лотереясида омад америкалик теннисчи томонида бўлди.
Ушбу иштирок орқали ҳамюртимиз 8 рейтинг очкоси ва 25,272 АҚШ доллари ишлаб олди.
