Бу масалага ойдинлик киритиш мақсадида Санитария-эпидемиологик осойишталик ва жамоат саломатлиги хизмати вакциналар ва иммунопрофилактика бўлими бошлиғи Дилорам Турсуновага мурожаат қилдик.
– “СПУТНИК-V” вакцинаси тез орада олиб келинади ва биринчи дозани олган ҳар бир киши иккинчисини олади, – дейди Санитария-эпидемиологик осойишталик ва жамоат саломатлиги хизмати вакциналар ва иммунопрофилактика бўлими бошлиғи Дилорам Турсунова. – Шу ўринда айтиш керакки, Жаҳон соғлиқни сақлаш ташкилоти ва «СПУТНИК-V» ишлаб чиқарувчисининг тавсиялари бўйича вакциналар орасидаги минимал оралиқ 21 кун. Лекин вакцинани 28 кунда ҳам 12 ҳафтагача ва 6 ойгача қилиш мумкин. Биз вакцинани кутамиз, у келиши билан уни дарҳол барча даволаш-профилактика муассасаларига тарқатамиз ва эмлаш ишлари ўтказилади. Шу сабабли аҳолини ҳеч ҳам хавотирланмасликни сўраб қоламиз. Ўз навбатида Соғлиқни сақлаш вазирлиги, Санитария-эпидемиологик осойишталик ва жамоат саломатлиги хизмати томонидан берилган тавсиялар – тиббий ниқоб тақиш, масофа сақлаш, хоналарни шамоллатиб туриш, гигиена қоидаларига риоя қилишларини эслатиб ўтамиз.
“Reuters” агентлигининг хабар беришича, Россия Федерацияси тўғридан-тўғри инвестициялар жамғармаси (РФПИ), “СПУТНИК-V” вакцинасини ишлаб чиққан муаллифларнинг фикрларига асосланиб, мазкур вакцина билан эмланишлар оралиғини (интервал) 180 кунгача узайтириш мумкин.
Мазкур агентликнинг маълумотларига кўра эмланишлар оралиғининг узайтирилиши, организмда кучлироқ иммунт жавоби шаклланишига олиб келади.
“Вакцинанинг биринчи ва иккинчи компонентлари билан эмланишлар рухсат этилган оралиғининг узайтирилиши мазкур вакциналарни халқаро даражада етказиб беришда юзага келаётган муаммолар билан боғлиқми деган саволга Россия Федерацияси тўғридан-тўғри инвестициялар жамғармаси вакиллари зинҳор у билан боғлиқ эмас, дея таъкидламоқдалар.
Аввал, Гамалея номли илмий тадқиқот институти директори Александр Гинцбург “СПУТНИК-V” вакцинасининг биринчи ва иккинчи компонентлари билан эмланиш оралиғини 21 кундан 90 кунгача узайтириш мумкинлигини маълум қилган.
Ҳозирга келиб, бевосита “СПУТНИК-V” вакцинасидан фойдаланаётган Аргентина ва Филиппин давлатлари мазкур вакцина билан эмлашлар оралиғини узайтирган.
“СПУТНИК-V” вакцинаси бугунги кунга қадар 3.5 млрд. аҳоли истиқомат қиладиган 67 та давлатда сифатли, хавфсиз ва самарадорлиги юқори бўлган вакцина сифатида тан олинган ҳамда расман рўйхатдан ўтказилган.
