Давлат божхона қўмитаси ахборот хизматининг маълум қилишича, хориждан Ўзбекистонга кириб келган йўловчилардан бирининг безовталаниши божхона ходимларининг диққатини тортган. Унга тегишли багаж белгиланган назорат-рентген ускунаси орқали кўздан кечирилганда шарбат тайёрлаш қурилмасининг тасвири экранда шубҳали акс этган.
Қурилманинг таг қисми махсус ускуна ёрдамида очиб кўрилганида унинг ичига жами 799 грамм оғирликдаги қиймати 320 миллион сўмлик қимматбаҳо тилла тақинчоқлар яширилгани аниқланган.
Бундан ташқари, бошқа бир шахс чўнтагидаги 1 дона тилла соатни божхона назоратига тақдим қилмай олиб чиқаётган вақтида тўхтатиб қолинган. Соатнинг ичига 1 дона тилла қуйма бўлаги ҳам яширилган бўлган. Соат ва тилла қуйманинг умумий оғирлиги 133.4 грамни, қиймати эса 25 миллион сўмни ташкил қилган.
