Тошкент шаҳар ҳокимлиги ҳузуридаги Рақамли ривожланиш департаменти томонидан http://geonom.tashkent.uz сайти синов тариқасида ишга туширилди.
18 ёшга тўлган ва пойтахтимизда доимий ёки вақтинча рўйхатдан ўтган фуқаролар сайтда рўйхатдан ўтиб, пойтахтимиздаги янги географик объектларни номлаш ва мавжудларини қайта номлашда иштирок этиши мумкин.
Ўзбекистон Республикаси Транспорт вазирлиги ва Тошкент шаҳар ҳокимлиги пойтахтимиз аҳолисини Метрополитен ер усти линиясининг Дўстлик-Қўйлиқ ва Олмазор-Сергели йўналишларидаги 19 та бекатга ном бериш жараёнида фаол иштирок этишга таклиф қилади.
Бунинг учун http://geonom.tashkent.uz ҳаволасига ўтиб, таклифларни киритиш мумкин.
Таклиф этилаётган ном:
— географик объектга энг хос бўлган белгиларни акс эттириши;
— жойлашган ердаги географик объектлар номларининг мавжуд тизимига мос тушиши;
— маҳаллий аҳолининг географик, тарихий, миллий, этник, тилга оид ва бошқа хусусиятларини ҳисобга олиши;
— универсал ва қисқа – кўпи билан учта сўздан иборат бўлиши керак.
Сайтда аҳолининг таклифлари йиғилади. Давлат бошқаруви ва маҳаллий давлат ҳокимияти органлари, тарихчилар, филологлар, ўлкашунос, топонимист, блогерлар ҳамда тегишли фаолият соҳаларида махсус билимларга эга бўлган экспертлардан иборат Ишчи гуруҳ келиб тушган таклифлардан ҳар бир бекат учун 3 тадан номни танлаб олади ва бу номлар онлайн овоз беришга қўйилади.
Таклифлар 2022 йилнинг 5 декабрдан 11 декабргача қабул қилинади.
