Бу ҳақда Чиқиндиларни бошқариш ва циркуляр иқтисодиётни ривожлантириш агентлиги хабар қилди.
Маълум қилинишича, Агентлик ташаббуси билан Қизил тоғ ҳудудида оммавий plogging эко-акция ташкил этилди.
Эко-акция бир вақтнинг ўзида Қорақалпоғистон Республикаси, Тошкент шаҳри ва барча вилоятларда ҳам бошланиб, унда қўмита ва агентлик тизими ходимлари, ўқувчилар, ёшлар, ОАВ вакиллари ҳамда жамоатчиликдан жами 500 нафарга яқин иштирокчи қатнашди.
Мутахассислар таъкидлашича, аҳоли гавжум ҳудудларда ўтказилаётган бундай акциялар одамларнинг чиқиндиларни тўғри ташлаш маданиятини шакллантиришда самарали ҳисобланади.
Амалий натижаларга кўра, “Қизил тоғ” ҳудуди 1 тонна 754 килограмм чиқиндидан тозаланди. Жамоалар ўртасида “Тоза ҳудуд” (195 кг) 1-ўринни, “Махсус полигон” (130 кг) 2-ўринни, “Биллинг” (106 кг) жамоаси эса 3-ўринни эгаллади.
Маълумот учун, акция давомида республика бўйлаб 2 минг нафардан ортиқ иштирокчи томонидан 20 га яқин ҳудуд 97 тонна 900 килограмм чиқиндидан тозаланган. Тозалаш ишларида 40 та махсус техника жалб этилди.
Эслатиб ўтамиз, агентлик томонидан ҳар йили “World Cleanup Day”, “Маҳаллани чиқиндидан ҳоли ҳудудга айлантирамиз” каби қатор экологик акциялар мунтазам ташкил этиб келинмоқда.
