Бош прокуратура ҳузуридаги Департаментнинг туман бўлими томонидан ўтказилган терговга қадар текширувда, тижорат банкларидан бирининг филиал бўлим бошлиғи Э.Н.нинг жиноий қилмишларига чек қўйилди.
Мухбиримизнинг аниқлашича, банк масъул ходими «А.» МЧЖ вакиллари ва бошқа шахслар билан олдиндан тил бириктирган. Улар сохта ҳужжатларни расмийлаштириш йўли билан «B.B.» МЧЖ номига 120 000 АҚШ доллари миқдорида кредит ажратилишига эришганлар. Кейинчалик ушбу маблағларни нақдлаштириб олган Э.Н. жами 120 минг долларни интернет тармоғидаги қимор ва таваккалчиликка асосланган ўйинларга тикиб, тўлиқ сарфлаб юборган.
Ҳозирда мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатларни қалбакилаштириш) билан жиноят иши қўзғатилган. Ҳуқуқ-тартибот органлари томонидан тергов ҳаракатлари давом эттирилмоқда.
