Қайд этилишича, туманнинг 2-мавзесида жойлашган масъулияти чекланган жамияти офисидан номаълум шахс ичида 50 минг АҚШ доллари бўлган сейфни ўғирлаб кетган.

Тезкор-қидирув тадбирлари натижасида жиноятни 1988 йилда туғилган Бобир исмли шахс ташкил этгани аниқланган. Шунингдек, 2000 йилда туғилган Шерзод ва ушбу МЧЖда ҳайдовчи бўлиб ишлаган Абдураҳмон ҳам қўлга олинган.

Тергов маълумотларига кўра, ҳайдовчи сифатида ишлаган Абдураҳмон жиноят содир этилишига кўмаклашган. У шеригига курьер (доставчик) сифатида кўриниш учун махсус сумка ва шлем берган. Шундан сўнг Шерзод тунги вақтда офис жойлашган бинога кириб, ертўладаги сейфни олиб, воқеа жойидан яширинган.

Ҳолат юзасидан Юнусобод тумани ички ишлар органлари томонидан Ўзбекистон Республикаси Жиноят кодекси 169-моддаси билан жиноят иши қўзғатилган. Ушбу моддага кўра, айбдор шахсларга 15 йилгача озодликдан маҳрум қилиш жазоси тайинланиши мумкин.

Тергов ҳаракатлари давом этмоқда.