Янги O`z DSt 37.001-2020 стандарти “Корхоналар фаолиятининг хавфсиз шароитларини стандартлар тизими. Туристик индустрия объектларида хавфсиз туристик хизматлар кўрсатишга доир тавсиялар”ни ўз ичига олган. Стандарт Саёҳат ва туризм бўйича халқаро кенгашнинг (WTTC) “Safe Travels: Global Protocols & Stamp for the New Normal” баённомалари, Испаниянинг “Medidas para la reducción del contagio por el coronavirus SARSCoV-2 Instituto para la Calidad Turística Española (ICTE)” ва Туркиянинг “Assessment form on Covid-19 and hygiene practices applied during pandemic for accommodation and food & beverage facilities” ҳужжатлари асосида ишлаб чиқилди.
Ушбу стандарт туризм хизматларини тақдим қиладиган ташкилотлар томонидан қўлланиши учун мўлжалланган. Янги стандарт инфекцион касалликларнинг оммавий тарқалиши (эпидемия, пандемия) ва ундан кейинги даврда туристик индустрия объектлари ишчи ва ходимларининг саломатлигини ҳимоя қилиш учун мақбул меҳнат шароитини ва жараёнини ташкил этиш, профилактик тадбирларни амалга ошириш, сайёҳларнинг саломатлигини таъминлаш мақсадида уларга санитария-гигиеник хавфсиз хизмат кўрсатиш бўйича тавсияларни ўз ичига олади ва қўлланилишда ихтиёрийлик касб этади.
Стандартдаги тавсиялар туристик объектларда, жумладан жойлаштириш воситалари, транспорт, умумий овқатланиш объектлари ва кўнгилочар, маърифий, ишбилармонлик, даволаш-соғломлаштириш, жисмоний тарбия-спорт объектларда тақдим этиладиган хизматларга татбиқ этилади. Шунингдек, стандарт объектларни текшириш, баҳолаш ёки тан олиш вақтида ҳам қўлланилиши мумкин. Ушбу стандарт талабларига мувофиқ сертификатлаштирилган объектларга махсус танитиш белгиси тақдим қилинади.
