Пойтахтимиздаги Миллий матбуот марказида Ўзбекистон ёшлар ишлари агентлиги, “Ёшлар овози” газетаси ва Ўзбекистон журналистлар уюшмаси ҳамкорлигида “Уч авлод учрашуви” ўтказилди.
Тадбирда “Ёшлар овози” газетасида узоқ йиллар фаолият юритиб ҳозирда нафақада бўлган устозлар, бугун жамият ҳаётида фаол иштирок этиб келаётган ўз сўзи ва ўрнига эга маҳоратли журналистлар ва ёшлар иштирок этди.
Айтиш керак, бугун “Ёшлар овози” газетаси янгича қиёфада, замон билан ҳамнафас бўлиб Ёшларга оид давлат сиёсати ва Ёшлар ишлари агентлигининг фаолиятини кенг ёритиб келмоқда. “Уч авлод учрашуви”да газетанинг ўтган даврдаги фаолияти, устозлар босиб ўтган йўл ҳақида ёшларга маълумот берилди. Қолаверса, газетанинг бугунги қиёфаси, унинг келгусидаги фаолияти ҳақида фикр алмашилди.
Бугунги кунда ўн ярим минг нусхада чоп этилаётган “Ёшлар овози” газетаси, ҳар бир маҳалла етакчисининг қўлига етиб бораётгани ҳамда жамоа ўз олдига янгиланаётган ўзбек журналистикасида ёшларнинг янги қиёфадаги матбуотини яратишдек, улкан мақсади борлиги таъкидланди. Бунга эришиш учун албатта, устозлар кўмагига таяниб, ёшларнинг шижоатидан унумли фойдаланиш зарур экани айтилди.
Кўтаринки руҳда ўтган “Уч авлод учрашуви”да фахрийлар журналистлар эндигина соҳага кириб келаётган ёшлар билан самимий суҳбат қилиб, улар билан ҳаётий тажрибаларини ўртоқлашди.
