Маълум қилинишича, амалдаги тартибга кўра буғдой ва ун маҳсулотлари юқори ликвидли ва ижтимоий аҳамиятга эга товарлар сифатида фақат биржа орқали сотилиши лозим.

Шу мақсадда ички бозорда нархлар барқарорлигини таъминлаш учун мазкур маҳсулотлар айланмаси доимий таҳлил қилиб борилмоқда.

Қўмита маълумотларига кўра, давлат ресурси ҳисобидан харид қилинган буғдойдан ишлаб чиқарилган ун маҳсулотларини биржага чиқармаслик ёки етарли ҳажмда таклиф этмаслик ҳолатлари аниқланган.

Шу асосда 2026 йил 3 апрелдан бошлаб белгиланган талабларга риоя этмаган 29 та корхонага нисбатан тегишли чоралар кўрилди ва улар биржа савдоларидан четлаштирилди.

Шунингдек, жорий йилнинг I чораги якунлари бўйича 25 та ун ишлаб чиқарувчи корхонага нисбатан қонунбузарлик ҳолатлари юзасидан иш қўзғатилиб, таъсир чораларини қўллаш бўйича қарорлар қабул қилинган.

Қўмита таъкидлашича, давлат ресурси буғдойини харид қилган корхоналар белгиланган нормалар асосида ун маҳсулотларини биржа орқали сотиши шарт. Талабларга риоя этилмаган тақдирда қатъий чоралар кўрилади.

Айни пайтда мазкур соҳада мониторинг ва назорат тадбирлари давом эттирилмоқда.