Ўзбекистондаги GTL заводи негизида қуввати йилига 100 минг тоннагача бўлган чизиқли алкилбензоллар ишлаб чиқаришнинг қурилиши режалаштирилган. Янги ишлаб чиқариш учун хом ашё сифатида GTL керосин ишлаб чиқариш жараёнида ҳосил бўладиган оралиқ маҳсулотлар хизмат қилади.
Чизиқли алкилбензол суюқ совунлардан бошлаб кир ювиш кукунларигача бўлган барча турдаги ювиш воситаларини ишлаб чиқариш учун асосий хом ашё ҳисобланади. Бугунги кунда ювиш воситалари бозори энг жадал ривожланаётган бозорлардан бири бўлиб, ҳам республикада, ҳам МДҲ мамлакатларида ЧАБга бўлган талаб сезиларли даражада ошганлиги кузатиляпти.
Имзоланган меморандум «Uzbekistan GTL» ва «Honeywell UOP» ўртасида ҳамкорликни кенгайтириш билан бирга янги ишлаб чиқаришни ташкил этиш бўйича техник-иқтисодий, лицензиялаш ва бошқа ҳужжатларни биргаликда ишлаб чиқишни назарда тутади, деб хабар беради Энергетика вазирлиги матбуот хизмати.
«Honeywell UOP» нефтни қайта ишлаш, нефть-кимё ва газни қайта ишлаш саноатлари учун қайта ишлаш технологиялари, катализаторлар, адсорбентлар, ускуналар ва консалтинг хизматларини етакчи халқаро етказиб берувчиси ва технологиялар лицензиари ҳисобланади.
