Бу ҳақда "Дунё" АА хабар қилмоқда.
Қайд этилишича, декларацияда АҚШ пойтахти мэри Ўзбекистонда Мустақиллик кунининг аҳамияти таъкидланиб, Америка Қўшма Штатлари Ўзбекистон мустақиллигини биринчилардан бўлиб тан олганини таъкидлаган.
Бу қарор нафақат юртимиз мустақиллиги, балки мустаҳкамланиб бораётган Ўзбекистон ва АҚШ алоқаларини ҳамда Америка пойтахтидаги ўзбек ҳамжамиятга бўлган юксак эътирофдан далолат беради.
Қўшма Штатлар пойтахтида 1 сентябрнинг "Ўзбекистон Республикаси Мустақиллигининг 34 йиллиги куни" деб эълон қилиниши шунчаки рамзий маъно эмас, бу икки халқ ўртасидаги тобора мустаҳкамланиб бораётган муносабатларнинг юксак белгисидир. Сўнги йилларда Ўзбекистон ва АҚШ ўртасида шаклланган яқин муносабатлар ўзаро стратегик шерикчиликнинг ёрқин ифодаси бўлиб, турли соҳалардаги янада кенгроқ ҳамкорликка замин яратмоқда.
Шунингдек, Ўзбекистон ўз мустақиллигини қўлга киритгандан буён, ўзининг фаол иқтисодий йўлини белгилаб олгани қайд этилган. Бу йўналишда жаҳон ҳамжамияти билан алоқаларни мустаҳкамлаб, тинчлик, бирдамлик ва ўзаро ҳурмат принциплари асосида кучли жамият қуришга эришди.
Бундан ташқари, шаҳар мэрияси Ўзбекистоннинг Вашингтондаги элчихонасига икки томонлама муносабатларни мустаҳкамлаш, шахслараро алоқаларни йўлга қўйиш ва икки давлат ўртасида маданий алмашинувни ривожлантиришда салмоқли муваффақиятларга эришгани учун миннатдорлик билдирди.
