Айни дамда ўқитувчининг мактабдаги носоғлом муҳит бўйича ижтимоий тармоқ фаолларига мурожаати кенг муҳокамаларга сабаб бўлмоқда.
Вазирлик матбуот хизмати жамоатчилик вакилларидан ҳар икки томонни ўргангандан сўнг холис ахборот тарқатишларини, шунингдек, вазирлик ишчи гуруҳи билан биргаликда ўрганиш жараёнларида иштирок этишлари мумкинлигини билдирди.
Эслатиб ўтамиз, мактабда ўқитувчи ва ўқувчи ўртасида юзага келган низоли ҳолат бўйича ўқувчининг ота-онаси ҳуқуқ-тартибот идораларига мурожаат қилган. Суд қарори билан ўқувчининг онаси ва мактаб ўқитувчисига нисбатан маъмурий чоралар қўлланилган.
Ишчи гуруҳнинг ўрганиш натижалари жамоатчиликка маълум қилинади.
Юқоридаги ҳолат нафақат педагоглар, балки ота-оналарни ҳам ҳушёр бўлишга ундаши керак. Сабаби фарзандларимиз мактабга таълим олиш учун келади, тарбия эса ота-она зиммасида бўлиши лозим.
Шу ўринда ўқитувчилардан ҳам ўқувчилар билан зиддиятли вазият юзага келганда, педагогга хос бўлган таъсир чораларини қўллаши лозимлигини, ҳар қандай ҳолатда ўзини қўлга олиб, боланинг ота-онаси билан биргаликда муаммога ечим топиши зарурлиги яна бир бор эслатилди.
