Ташрифдан мақсад мазкур давлат билан янги савдо-иқтисодий алоқаларни йўлга қўйишдир.
Уюшма раҳбарияти Вьетнамнинг «Thuong Dinh Pootwear» акциядорлик жамияти Бош директори Нгуен Ван Хим билан музокаралар ўтказди.
Маълумот учун: Корхона 1957 йилда ташкил топган. Асосий фаолият йўналиши барча турдаги вулканизацияланган ва канвас пойабзал маҳсулотларини ишлаб чиқаришдир. Айни вақтда корхонада 6 та замонавий ишлаб чиқариш линияси, компьютерлаштирилган тўқув дастгоҳлари мавжуд. жамиятда 1 000 нафарга яқин ишчи-ходим фаолият юритади, ойига 200 минг жуфт пойабзал ишлаб чиқарилади.
Шунингдек, «Thuong Dinh Pootwear» пойабзал саноати учун мўлжалланган резина ва елимлар ишлаб чиқарувчи йирик корхона ҳам саналади. Музокаралар корхонанинг ишлаб чиқариш қувватлари билан танишиш билан давом этди. Учрашувда томонлар бир вақтнинг ўзида бир нечта йўналишлар бўйича ҳамкорликни кўриб чиқди.
Биринчи йўналишда мамлакатимизда ишлаб чиқарилган тайёр чарм маҳсулотларини етказиб бериш бўйича ҳамкорлик йўлга қўйилади. «Thuong Dinh Pootwear» АЖ шунингдек, Ўзбекистондан чарм етказиб бериш бўйича дистрибютор вазифасини ўташни режалаштиряпти.
Компания Ўзбекистондаги «Hamkor Nur», «Nafis Charm» ва «Peng Sheng» каби турли ишлаб чиқарувчиларнинг чарм маҳсулотлари намуналарини ўрганиб чиқади. Харажатлар ва логистика масалаларини таҳлил этилади.
Кун тартибидаги иккинчи масала – Ўзбекистоннинг пойабзал саноатида қўлланиладиган резина ва латекс елимларни етказиб бериш масаласи бўлди.
«Thuong Dinh Pootwear» акциядорлик жамияти ушбу маҳсулотларни дунёдаги энг йирик етказиб берувчиларидан бири бўлиб, уларнинг маҳсулотлари Хитой орқали олиб келинади. Учрашувда пойабзал ишлаб чиқариш тан нархини янада пасайтириш имконини берувчи резина ва елимни воситачиларсиз тўғридан-тўғри етказиб беришни йўлга қўйиш масаласи муҳокама этилди. Учинчи йўналиш – бу корхонанинг пойабзал маҳсулотларини Ўзбекистон бозорида сотиш.
Корхона каучук тагликли кроссовкалар ишлаб чиқаради. Оёқ кийимлари «йиғилган» тўлиқ блокда тайёрланади. Таглик ёпиштирилади. Қўшимча равишда ён томонларида махсус каучук тасма билан қопланади. Шундан сўнг, кроссовкалар партияси махсус печга юборилади. У ерда 75-80 дақиқа давомида тахминан 100-110 даража ҳароратда иситилади.
Ўзбекистонда бу ишлаб чиқариш йўналиши ҳали ўзлаштирилмаганлиги боис ҳамкорларга нафақат пойабзалларни импорт қилиш, балки мамлакатимизда қўшма ишлаб чиқариш лойиҳасини ташкил этишни назарда тутувчи ҳамкорлик ташаббуси таклиф этилди.
Вьетнам компанияси раҳбарига Ўзбекистоннинг чарм-пойабзал тармоғидаги саноат салоҳияти, ишбилармонлик муҳити, инвесторларга яратилаётган шароитлар ҳақида батафсил маълумот берилди.
Шунингдек, солиқ ва божхона имтиёзлари, мамлакатимизнинг 16 ҳудудида чарм-пойабзал маҳсулотлари ишлаб чиқаришга ихтисослашган махсус кичик саноат зоналарининг афзалликлари ҳақида ахборот тақдим этилди.
Томонлар Вьетнам компанияси билан янги лойиҳа ва ҳар томонлама ҳамкорликнинг бошқа жиҳатларини, савдо-иқтисодий алоқаларнинг келгуси истиқболларини 5-7 апрель кунлари бўлиб ўтадиган «UzCHarmExpo Shoesstar Eurasia 2023» халқаро кўргазмаси доирасидаги бизнес ташриф чоғида батафсил таҳлил қилиб, якуний қарорни ишлаб чиқишга келишиб олдилар, деб хабар беради «Ўзчармсаноат» уюшмаси матбуот хизмати.
