Ушбу мавзу бўйича аввал ҳам расмий тушунтиришлар берилган эди, бироқ маълумотлар бузилиши давом этмоқда.
Тошкент шаҳри ҳокимлигининг тушунтиришича, вилоятлардан Тошкентга автомобиллар киришига ҳеч қандай чеклов ёки тақиқлар жорий этилмаяпти.
Таъкидланишича, гап назорат-ўтказиш пунктларини модернизация қилиш ва улар негизида замонавий транспорт тугунларини яратиш ҳақида бормоқда. Назорат-ўтказиш пунктларининг бир қисми шаҳар ташқарисига кўчирилади, бир қисми қайта қурилади. Бу ҳудудларда катта автотураргоҳлар, кемпинглар, дам олиш жойлари ва, энг муҳими, шаҳарга тез ва қулай етиб олиш имконини берадиган ривожланган жамоат транспорти инфратузилмаси барпо этилади.
"Бу қўшимча имконият, мажбурият эмас. Ҳайдовчилар ўз хоҳишига кўра шаҳарга киришда автомобилни қолдириб, йўлни жамоат транспортида давом эттириши ёки аввалгидек шахсий автомобилида шаҳарга кириши мумкин бўлади. Бундай «Park & Ride» модели дунёнинг етакчи мегаполисларида кенг қўлланилади ва фақат транспорт вазиятини яхшилаш ҳамда аҳоли турмуш сифатини оширишга қаратилган", — дейилади баёнотда.
Тошкент шаҳри аҳолиси учун ушбу чора-тадбирлар транспорт юкламасини камайтириш, тирбандликларни камайтириб, экологик ҳолатни яхшилашни англатади. Пойтахт меҳмонлари учун эса — шаҳарнинг марказий қисмида тўхташ жойларини излаш заруратидан халос бўлиш ва ҳаракатланишнинг энг қулай усулини танлаш имкониятини беради.
Шундай қилиб, гап тақиқлар ёки чекловлар ҳақида эмас, балки фуқаролар учун танловни кенгайтирадиган ва шаҳарнинг умумий қулайлик даражасини изчил оширадиган транспорт оқимларини бошқаришнинг янада оқилона, замонавий ва мослашувчан тизимини шакллантириш ҳақида кетмоқда.
