Аргентиналик машҳур футболчи Диего Марадона 2020 йилнинг 25 ноябрь куни юрак етишмовчилиги туфайли вафот этган эди. Шундан сўнг унинг ўлими билан боғлиқ турли гап-сўзлар пайдо бўлди. Унинг яқинлари врачларни Диегога вақтида ёрдам бермаганликда айблади ва бу иш билан мамлакат прокуратураси шуғулланди.
Яқинда ушбу текширув натижалари эълон қилинди. France 24 хабарида айтилишича, прокурорлар футболчини даволаш билан шуғулланган саккиз нафар шифокорни эҳтиётсизлик орқасида одам ўлдиришда айблаган. Бу шифокорлар орасида нейрохирург ва оилавий шифокор Леополдо Луке, руҳий касалликлар врачи Агустина Косачов, руҳшунос Карлос Диаслар бор.
Дунё футболи юлдузларидан бири, жаҳон чемпиони, икки карра Италия чемпиони, Аргентина чемпиони, ФИФА сўрови бўйича ХХ асрнинг энг кучли футболчиси Диего Марадона ўз фаолияти давомида Италиянинг “Наполи”, Испаниянинг “Севиля”, “Барселона”, Аргентина миллий терма жамоаси ҳамда кўплаб клубларида тўп сурган. Шунингдек, фаолияти давомида бир нечта клуб ва миллий жамоага мураббийлик ҳам қилган.
