Судланувчи Ван Юнь «Менмен» болалар боғчасида ишлаб юрган пайтида Сун фамилияли ўқитувчи билан жанжаллашиб қолган. Ҳамкасбидан ўч олмоқчи бўлган тарбиячи 2019 йил 27 мартда эрталаб Суннинг гуруҳидаги ўқувчилар бўтқасига натрий нитрит қўшиб қўйган. Натижада 25 нафар бола заҳарланишдан шифохонага ётқизилган, улардан бири эса кейинроқ шифохонада вафот этган.
Тергов-суриштирув давомида Ван Юнь бу иш билан биринчи марта шуғулланмаётгани маълум бўлган. У илгари ҳам бошқалардан аламини олиш мақсадида бир неча марта натрий нитритдан фойдаланган экан. 2017 йил у аёл турмуш ўртоғи билан жанжаллашиб қолиб, ўша йили февраль ойида интернет орқали натрий нитрит сотиб олган эканда, у ичмоқчи бўлган стакандаги сувга қўшган экан. Турмуш ўртоғи бундан заҳарлансада, организм учун жиддий асорат қолдирмаган экан.
Суд аёлнинг натрий нитрит ҳаёт учун хавфли эканлигини яхши билсада, ўч олиш мақсадида ундан одамларга қарши фойдаланганини аниқ кўрсатиб берган. Хабарда Ван Юнь ўша кунги бўтқани кўп бола ейишини билган, лекин аёл фикридан қайтмаган, дейилади.
Суд Ван Юннинг жиддий талафотлар келтириб чиқарган жиноят усулини «нафратланарли даражада» эканлигини, ва унинг қонунга мувофиқ жазоланиши керак эканлигини таъкидлаган, деб хабар беради РИА Новости.
