Ушбу лойиҳани амалга ошириш учун Европанинг илғор 12 та академик ва олий таълим муассасалари ҳамда 1 та ишлаб чиқарувчи корхонаси иштирокида «HYDRO4U» консорциуми ташкил қилинган.
Таъкидлаш жоизки, икки кун давом этадиган мазкур йиғилишда консорциум аъзолари томонидан ўтган 2021 йилда лойиҳа доирасида амалга оширилган кенг кўламли фаолиятнинг натижалари ҳамда келажакдаги истиқболли режалар муҳокама қилинади.
Бу борада, «Ўзбекгидроэнерго» АЖ ва «HYDRO4U» консорциуми томонидан ҳамкорликда олиб борилган ишлар натижасида, Фарғона вилоятининг сўлим Шоҳимардон қишлоғига қуввати 2,2 МВтлик, умумий қиймати 2 миллион еврога тенг ГEС қурилишига технологик ускуналар келтириш учун Европа Иттифоқининг 1,0 миллион евролик грант маблағларининг жалб этилишига эришилди.
Шунингдек, жаҳонда ушбу йўналишда етакчи бўлган Австриянинг «Глобал Гидро» компанияси билан технологик ускуналар келтириш учун шартнома имзоланади. Ҳозирда мазкур компания томонидан технологик ускуналарни ишлаб чиқаришга киришилди.
Лойиҳадаги қурилиш-монтаж ишлари, электр энергиясини узатиш ва механик ускуналарни келтириш учун «Ўзбекгидроэнерго» АЖнинг қарийб 12 миллиард сўмлик ўз маблағлари йўналтирилади.
Ушбу ГEСнинг фойдаланишга топширилиши натижасида йилига қўшимча ўртача 12 800 минг киловат/соат электр энергияси ишлаб чиқарилиши таъминланиши кутиляпти.
Бу эса, Шоҳимардонда яшовчи қарийб 7 000 нафар аҳоли ёки 2 100 та хонадоннинг электр энергиясига бўлган талабини тўлиғича узлуксиз қондириш ҳамда ушбу ҳудудда ишлаб чиқариш ва туризмни ривожлантириш орқали янги иш ўринларини яратиш имконини беради.
Бундан ташқари, мазкур лойиҳа доирасида қўлланилаётган блок-модулли микроГEС ускуналари қурилиш харажатларини қарийб 500 минг еврога тежаш имконини яратди, деб хабар беради Энергетика вазирлиги «Ўзбекгидроэнерго» АЖ маълумотига таяниб.
Шартнома графигига мувофиқ, Шоҳимардон ГEСининг 2023 йил сентябрь ойида фойдаланишга топширилиши кўзда тутилган.
