Шу муносабат билан ўтказилган тантанали тадбирда Соғлиқни сақлаш вазири Б. Мусаев, Япония Парламентининг вакиллар палатаси аъзоси Кеидзи Фуруя, Япониянинг Ўзбекистондаги Фавқулодда ва Мухтор элчиси Ёшинори Фудзияма иштирок этди.
Унда қайд этилганидек, COVID-19 пандемиясининг илк кунлариданоқ Япония ҳукумати Ўзбекистонга биринчилар қаторида инсонпарварлик ёрдами кўрсата бошлади.
Хусусан, 2020 йил март ойида мамлакатимиз соғлиқни сақлаш тизимини қўллаб-қувватлаш мақсадида ушбу давлат томонидан 500 миллион иена ажратилди.
Мазкур маблағ ҳисобига дастлаб Японияда ишлаб чиқарилган вирусга қарши самарали дори воситалари, кейинчалик Япония халқаро ҳамкорлик агентлиги (JICA) томонидан мамлакатимиз тиббиёт муассасаларига юқори технологик рентген аппаратлари олиб келиб ўрнатилди.
Бу гал ушбу грант лойиҳаси ҳисобидан юртимиздаги 3 та тиббиёт муассасасига Aquilion Prime SP 160 KT компьютер томографияси ускуналари ҳамда 1 дона махсус жиҳозланган SANSEI тиббий-диагностика контейнери топширилди.
Режага мувофиқ, замонавий компьютер томографияси қурилмалари Республика шошилинч тиббий ёрдам илмий маркази, Республика эпидемиология, микробиология, юқумли ва паразитар касалликлар илмий-амалий тиббиёт маркази ҳамда Бухоро давлат тиббиёт институти клиникасига тақдим этилди.
Тиббий диагностика контейнери эса юртимизнинг олис ҳудудларида яшовчи аҳолига сифатли тиббий хизмат кўрсатиш мақсадида Республика шошилинч тиббий ёрдам илмий марказига топширилди.
Ушбу компьютер томографиясининг ўзига хос афзалликлари шундаки, у орқали беморларни ҳар қандай текширувдан ўтказиш мумкин. Қолаверса, ушбу ускунанинг бошқариш опцияси минимал радиация таъсирида юқори сифатли тасвирларни олиш имконини беради.
Бундан ташқари, SANSEI тиббий-диагностика контейнери офлайн режимда ишловчи мустақил мобил диагностика жамланмаси бўлиб, у компьютер томографияси, ультратовуш диагностика ҳамда рентген аппаратлари билан жиҳозланган.
Тадбирда мазкур замонавий ускуналар беморларга ўз вақтида аниқ ташхис қўйишга хизмат қилиши, шунингдек, соҳа ходимларига катта қулайлик яратиши алоҳида таъкидланди, деб хабар беради Соғлиқни сақлаш вазирлиги матбуот хизмати.
