Музокаралар давомида томонлар ўзаро ҳамкорликнинг долзарб масалаларини ҳамда уни кенгайтириш истиқболларини муҳокама қилдилар. Ўзбекистон томони илгари эришилган барча келишувларни тўлиқ амалга ошириш ва мамлакатлараро муносабатларга ўзига хос фаоллик ва жўшқинлик бахш этиш мақсадида Япония парламенти билан яқин ҳамкорликни давом эттиришга тайёрлигини билдирди.
Икки давлат ўртасидаги муносабатларнинг юқори даражасини ва унинг иқтисодий ва ижтимоий ривожланишга ижобий таъсирини таъминлашда қонун чиқарувчи органларнинг муҳим роли қайд этилди. Шу муносабат билан томонлар Япония Парламентининг Дўстлик лигаси ва Парламентлараро ҳамкорлик гуруҳи фаолиятини жадаллаштириш орқали парламент дипломатиясини изчил кенгайтиришга тайёрликларини билдирдилар.
Музокаралар якунида томонлар давлат бошқаруви тизимида демократик асосларни кенгайтириш, ижро этувчи ҳокимият органлари устидан парламент назоратини амалга ошириш ва, бошқа йўналишлар билан бир қаторда, бизнес ва инвесторлар билан муносабатларни тартибга солувчи қонунчилик базасини такомиллаштириш бўйича тажриба алмашишни йўлга қўйиш муҳимлиги тўғрисида якдил фикрга келдилар, деб хабар беради Инвестициялар ва ташқи савдо вазирлиги матбуот хизмати.
