Учрашувда дастлаб компаниянинг асосий вазифаси ва у томонидан амалга ошириладиган ишлар хусусида ахборот берилди. Жумладан, компания 1990 йилда ташкил этилган бўлиб, хусусий секторда фаолият олиб боради. Шунингдек, IТ йўналишида бутун Япония бўйлаб хизмат кўрсатиб келиши билан бир қаторда, дунёнинг бошқа етакчи давлатларига ҳам ўз хизматларини тақдим этиб келади. Ҳозирга келиб, компанияда 2133 нафар ходим хизмат кўрсатиши айтиб ўтилди.
Шу билан бирга, учрашувда меҳмонлар Ўзбекистоннинг меҳмондўстлиги ва мамлакатнинг IТ соҳасида амалга оширилаётган улкан ишларини эътироф этишди.
Шунингдек, Япония бўйлаб келгусида 800 мингга яқин IТ инженерлар етишмовчилиги тахмин қилинаётгани, шу мақсадда хориждан етакчи IТ ходимларни жалб қилишга катта эътибор қаратилаётгани қайд этилди. Жумладан, ушбу йўналишда ўзбекистонлик IТ мутахассислар билан биргаликда ишлаш, улар билан ҳамкорликни йўлга қўйиш ҳамда малакали кадрларни тайёрлашга кўмаклашиш ва кадрларни жалб қилиш бўйича таклифлар берилди.
Учрашувда меҳмонларга Ўзбекистонда IТ хизматлар экспорти йўналишида амалга оширилаётган ишлар, ҳудудларда фаолият олиб бораётган IТ Park филиаллари ҳақида батафсил маълумотлар тақдим этилди. Ўз навбатида, IТ Park резидентлари учун яратилган шароитлар, тақдим этилган солиқ имтиёзлари тушунтириб ўтилди.
Учрашув сўнгида Рақамли технологиялар вазири ўринбосари Рустам Каримжонов компания вакилларини ҳар йили октябр ойида ўтказиб келинаётган ICT Week ҳафталигига таклиф этиб, япон компанияларини бу каби халқаро йирик АКТ ҳафталигида кўриш мамлакат IТ саноати учун манфаатли бўлишини таъкидлади.
