Савол: Ўзбекистон Республикаси элчихоналари ва консуллик муассасалари томонидан фуқаролар хавфсизлиги ва фаровонлигини таъминлаш бўйича қандай чоралар кўрилмоқда?
Жавоб: Ўзбекистон Республикасининг Яқин Шарқ мамлакатларидаги дипломатик ва консуллик муассасалари ижтимоий-сиёсий ва ҳарбий-сиёсий вазиятни 24/7 форматда доимий мониторинг қилиб бормоқда.
Қабул қилувчи давлатларнинг ташқи ишлар идоралари, ҳуқуқни муҳофаза қилувчи органлари, фуқаролик муҳофазаси хизматлари ҳамда авиация маъмуриятлари билан доимий ҳамкорлик йўлга қўйилган.
Савол: Тезкор линиялар ва фавқулодда алоқа каналлари ташкил этилганми?
Жавоб: Элчихоналар ва консуллик муассасалари ҳузурида «тезкор линия»лар, шунингдек, Ўзбекистон Республикаси Ташқи ишлар вазирлигининг Call-маркази фаолият юритмоқда.
Фуқаролардан келиб тушаётган барча мурожаатлар рўйхатга олиниб, доимий ўрганиб борилмоқда, аксарият масалалар тезкорликда ҳал этилмоқда.
Сўнгги маълумотларга кўра:
- минтақадаги фуқаролардан келиб тушган мурожаатлар сони 2 144 тани ташкил этмоқда;
- манзилли консуллик ва молиявий ёрдам кўрсатилмоқда.
Фуқаролар расмий веб-сайтлар, ижтимоий тармоқлар ва каналлар орқали эҳтиёт чоралари, авиарейслар ҳолати ҳамда ҳаракатлар алгоритми бўйича мунтазам хабардор қилинмоқда.
Савол: Фуқаролар кўпроқ қандай масалаларда мурожаат қилмоқда?
Жавоб: Мурожаатлар мунтазам равишда келиб тушмоқда.
Асосий масалалар қуйидагиларга тааллуқли:
- эвакуация;
- авиарейсларнинг бекор қилиниши ёки бошқа санага кўчирилиши;
- вақтинчалик турар жой билан таъминлаш;
- мамлакатда қолиш муддати узайиши муносабати билан молиявий қийинчиликлар.
Дубай, Шаржа ва Доҳа аэропортларида «Ватандош» жамғармаси орқали бир гуруҳ фуқароларга молиявий ёрдам кўрсатилди.
Савол: Яқин Шарқ минтақасидан Ўзбекистон фуқароларини эвакуация қилиш ва махсус рейслар ташкил этиш бўйича қандай ишлар олиб борилмоқда?
Жавоб: Ўзбекистон Республикаси Президентининг топшириғига мувофиқ, фуқароларимизни Ватанга қайтариш бўйича тизимли чора-тадбирлар амалга оширилмоқда.
Яқин Шарқ минтақасидаги вазиятдан келиб чиққан ҳолда ва юртдошларимиз хавфсизлигини таъминлашни инобатга олиб, доимий ҳамда қўшимча рейслар ташкил этилмоқда. Ишлар доимий асосда олиб борилмоқда.
Жумладан:
- Саудия Арабистонидан тизимли эвакуация амалга оширилмоқда;
- Бирлашган Араб Амирликларидан «Uzbekistan Airways» авиакомпанияси репатриация рейсларини амалга ошириш масаласини ишлаб чиқди;
- авиакомпаниялар билан чартер рейсларни келишиш ишлари олиб борилмоқда;
- минтақадаги авиация регуляторлари билан мувофиқлаштириш таъминланмоқда.
Ҳаво ҳудудининг ёпилиши ва «ҳаво ҳужуми» режими шароитида имкониятлар чекланган бўлсада, ишлар узлуксиз равишда олиб борилмоқда.
Савол: Яқин Шарқда жабрланганлар орасида Ўзбекистон фуқаролари борми?
Жавоб: Бугунги кун ҳолатига кўра, Ўзбекистон Республикаси фуқаролари орасида ҳалок бўлганлар ёки жабрланганлар йўқ.
Вазият доимий назорат остида.
