Футбол бўйича Германия миллий терма жамоаси бош мураббийи Йоаҳим Лёв жорий йил ёзда ўтадиган Европа чемпионатидан кейин ўз лавозимини тарк этишини билдирди. Аслида у билан тузилган шартнома муддати 2022 йилги жаҳон чемпионатидан сўнг тугаши керак эди.
Лёв 2006 йилдан буён Германия миллий жамоасини бошқариб келмоқда. Унинг қўл остида жамоа 2014 йилда жаҳон чемпионлигини қўлга киритганди. Шунингдек, Европа чемпионатларида кумуш ва икки марта бронза медалига сазовар бўлди.
Терма жамоа бош мураббийининг кетиши расман эълон қилингандан сўнг ОАВда унинг ўрнини эгаллаши мумкин бўлган номзодлар ҳақида маълумотлар тарқала бошлади. Улардан бири “Ливерпул” бош мураббийи Юрген Клопп эди. Яқинда у Германия миллий жамоасини бошқариши мумкинлиги ҳақидаги миш-мишларга жавоб қайтарди.
“Германия миллий жамоасини бошқариш ниятим йўқ — деди у Liverpool Echo’га берган интерьвюсида. — Ёздан кейин ҳам бу режаларимдан ўрин олмаган. Лёв миллий жамоа бош мураббийи сифатида ажойиб фаолият юритди. У Германия тарихидаги энг муваффақиятли мутахассислардан бири бўлиб қолади. Европа чемпионатидан сўнг унинг ўрнига келиши мумкин бўлган германиялик мураббийлар талайгина.
Таклиф тушган тақдирда ҳам рози бўлмайман. Ёзда ҳам, Евро-2020дан кейин ҳам мен бўш бўлмайман. “Ливерпуль” билан яна уч йиллик шартномам бор. Шартномага имзо чекилгандан кейин унга амал қилиш ҳам керак, шундай эмасми.”
Хуллас, Лев ўрнини ким эгаллаши ҳозирча аниқ эмас.
