Бу ҳақда метрополитен матбуот хизмати хабар берди.
Маълум қилинишича, поезд йўловчиларни қабул қилиб, эшиклар ёпилаётган пайтда йўловчилардан бири вагонга кириш мақсадида эшикни очишга уринган. Оқибатида эшикни ҳимоя қилувчи қурилма механизми ишдан чиққан.
Машинист томонидан носозлик дастлаб бартараф этилганига қарамай, у кейинги бекатга етмасдан қайта такрорланган. Шундан сўнг йўриқнома талабларига мувофиқ, йўловчилар бекатга туширилиб, ҳаракат таркиби электродепога олиб кетилган.
Метрополитен маъмурияти йўловчилардан хавфсизлик талабларига қатъий риоя қилишни ҳамда метро мулкига зиён етказмасликни сўрайди. Таъкидланишича, биргина эътиборсизлик йўловчилар ҳаёти ва хавфсизлигига жиддий таҳдид солиши мумкин.
“Тошкент метрополитени” ДУК метрода ҳаракатланиш қоидаларини ҳам эслатди:
- бекатга яқинлашганда вагондан тушиш учун эшикларга олдиндан яқинлашинг;
- вагонлардан чиқаётган йўловчиларга аввал йўл беринг;
- йўловчилар тўлиқ тушиб бўлгач, вагонга чиқинг;
- вагонга киргач, эшик олдида туриб олманг, вагон ўртасига ҳаракатланинг;
- метро вагонлари эшикларига суянманг;
- бекат ва йўлакларда ҳаракатланишда ўнг қўл қоидасига амал қилинг.
Юқоридаги қоидаларга риоя этиш барчанинг хавфсизлиги ва қулайлигини таъминлаши билдирилди.
